Google собиқ ходими Лара Нолан сунъий интеллектли қурол яратиш хавфли оқибатларга олиб келиши мумкинлигидан огоҳлантирди, деб хабар бермоқда DailyStar.
Нолан Google компаниясини ўтган йили тарк этган. Бу унинг АҚШ армияси учун ҳарбий дронлар ишлаб чиқариш лойиҳасига тайинланганига қарши норозилик белгиси бўлган. Унинг айтишича, шундан буён сунъий интеллектли қурол ишлаб чиқариш кучайди ва у давлатлар раҳбарларини бу муаммога жиддийроқ муносабатда бўлишга чақирмоқда.
Агар бирор ҳудудда кўплаб автоном қуроллар бўлса, жанговар тизимлар бир-бирига қарши тўқнашиб, зиддиятли «тўсатдан уруш» ҳолати юзага келиши мумкин.
Лара ҳарбий сунъий интеллект тизимини фонд биржасидаги автомат алгоритмларга қиёслаган. Аммо уни «ўчириш» мумкин, ҳарбий тизимда эса бундай имконият йўқ. Энг ёмони, тўсатдан юзага келган уруш бутун бошли шаҳарни бир неча сонияларда йўқ қилиб юбориши мумкин.
Лара Нолан Campaign to Stop Killer Robots CTSKR (қотил роботларни тақиқлаш кампанияси)нинг сунъий интеллектли қуроллардан фойдаланишни тақиқловчи халқаро шартномани имзолаш ташаббусини қўллаб-қувватлайди. Аммо Россия ва АҚШ каби давлатлар эса CTSKRнинг бундай ташаббусига эътиборсиз қарамоқда.
Изоҳ (0)