Чеченистонда республикани бошқараётган элита қатлами орасида оммавий «тозалаш» амалга оширилгани маълум қилинди. «Новая газета» томонидан маълум қилинишича, қўлга олинганлар орасида республика бўйича Фавқулодда вазиятлар вазири Руслан Яҳёев, собиқ ўрмон хўжалиги вазири Дикмогамед Муллаев, ижтимоий блок бўйича бош вазирнинг собиқ ўринбосари Холид Вайхонов ва бошқа юқори мансабли мутасаддилар бор.
«Тозалаш» август ойида, Аргун шаҳри мери Иброҳим Темирбоев ишдан бўшатилганидан бир неча кун ўтгач бошланган. Иброҳим Темирбоев ва республиканинг амалдаги раҳбари Рамзан Қодиров ўртасидаги қарама-қарши муносабатлар 2006 йилда юзага келган. Ўшанда Темирбоев ўша вақтдаги республика раҳбари Али Алханов билан учрашув вақтида уни қўллаб-қувватлашни таклиф қилган. Аниқлик киритилишича, учрашувда Идрис Ғоибов ва Шамил Магмаев каби ўша вақтдаги куч тузилмаларининг катта таъсирга эга мансабдорлари ҳам иштирок этган. Улар ўтган йилда қўлга олинган ва қийноққа солинган.
Нашрнинг ёзишича, Темирбоев телефон сўзлашувларида Қодиров ва унинг оиласи ҳақида сиёсий жиҳатдан нотўғри гапирган, бу сўзлашувлар эса эшитилган. Натижада Аргун мерлигига Қодировнинг 28 ёшли қариндоши тайинланган.
Хабар берилишича, республика бўйича ички ишлар вазирининг биринчи ўринбосари Апти Оловуддинов ҳам қўлга олинган. Оловуддинов Темирбоевнинг уйида меҳмон бўлганда Қодировнинг портретини мазах қилганлиги айтилмоқда. База нашрнинг маълумотларига кўра, Оловуддинов ва Қодиров ўртасидаги низо Оловуддинов томонидан уюштирилган базмдан сўнг юзага келган. Базмда Чеченистон ЙҲХ давлат инспекциясининг собиқ бошлиғи Шамхан Денилхонов ва ФВВнинг маҳаллий раҳбари Руслан Яҳёев ҳам иштирок этган. Маълум бўлишича, айнан ана шу базмда Оловуддинов маст ҳолатда бошқалар билан бирга Қодировнинг портретини мазах қилган. Базм ҳақида Темирбоев сўроқ вақтида гапирган.
Изоҳ (0)