АҚШ президенти Дональд Трамп Туркияга нисбатан Сурия шимолидаги ҳарбий операция учун чеклов чораларини жорий этишга қаратилган қарорни имзолади. Бу ҳақда АҚШ давлат котиби Майк Помпео маълум қилди, дея хабар беради «Интерфакс».
«Президент Трамп Туркия Суриянинг шимоли-шарқидаги ҳужумларини тўхтатиши ва зудлик билан ўт очишга барҳам беришига қаратилган қарорни имзолади. Бу қарор Молия вазирлиги ва Давлат департаментига Сурияда барқарорлик ва хавфсизликка раҳна солаётган, фуқаролар учун таҳдид туғдираётган ҳаракатлари учун Туркия тизимлари ва шахсларига қарши санкциялар қўллаш ҳуқуқини беради», — дейилади Помпеонинг баёнотида.
АҚШ расмийлари Туркия Мудофаа ва Энергетика вазирликлари, шунингдек, мамлакат мудофаа, ички ишлар ва энергетика вазирларига нисбатан санкциялар эълон қилишга улгургани айтилмоқда. Мазкур вазирлик ва вазирларнинг АҚШдаги активлари музлатилади, Қўшма Штатлар фуқароларига улар билан иш олиб бориш тақиқланади.
Эслатиб ўтамиз, Туркия қуролли кучлари 9 октябрь куни Суриянинг шимоли-шарқида курд тузилмаларига қарши ҳарбий операцияни бошлади.
Изоҳ (0)