Туркиянинг ҳарбий ҳаракатлари сабаб Сурияда 130 мингдан ортиқ одам уйларини тарк этди

Телл-Обод ҳамда Рас ал-Айн туманларида яшовчи 130 минг нафардан кўпроқ одам Туркиянинг ҳарбий операцияси сабаб ўз уйларини тарк этишди. Бошқа ерга кўчиб ўтаётган фуқаролар сони 400 мингдан ошиб кетиши мумкин, дея таъкидлаган Бирлашган Миллатлар Ташкилотининг олий комиссари бошармасининг расмий вакили Йенс Лерке. Бу ҳақда «РИА Новости» хабар берди.

«Сурия шимоли-шарқидаги Телл-Обод ва Рас ал-Айн туманларидан аҳолининг бошқа ерга кўчиши ҳали ҳам давом этмоқда. Тахминларга кўра, 130 мингдан ошиқ одам ўз уйларини тарк этган ва бу ҳали бизгача етиб келган энг аниқ маълумот эмас», — дея таъкидлаган Лерке.

Шунингдек, у 11 октябрь, жума куни ушбу икки туман ҳудудидаги давлат ҳамда хусусий шифохоналарнинг барчаси ёпилганлигини маълум қилди. Гуманитар агентликлар ҳам ҳарбий ҳаракатлар амалга оширилаётган ҳудудлардаги ўз ходимларининг хавфсизлигидан хавотирга тушмоқда. Камишлидаги аҳоли пунктида БМТнинг 134 нафар ходими қолиб кетган, уларнинг 124 нафар маҳаллий, 10 нафари эса хорижлик мутахассислар. Суриянинг ушбу ҳудудида ишловчи хорижлик ходимларнинг сони 384 тадан 200 га тушиб қолган.

Туркия президенти Ражаб Тоййиб Эрдўғон 9 октябрда Сурия шимоли-шарқида Курдистон ишчи партияси ҳамда ИШИД жангариларига қарши «Тинчлик булоғи» ҳарбий операцияси бошланганлигини эълон қилган. Шу куни Туркия ҳарбий ҳаво кучлари Рас ал-Айн шаҳри ва Суриянинг бошқа ҳудудларига ҳаводан ҳужумлар уюштирган. Кейинчалик Туркия қўшинининг ушбу ҳудудга бостириб киргани хабар қилинган. Сурия ҳукумати Туркиянинг ушбу ҳаракатларига бир неча бор қаршилик қилишга уринди. Россия Туркияни Суриядаги вазиятни янада чигаллаштириб юбориш хавфидан огоҳлантирган. Европа иттифоқи, АҚШ, Эрон, Миср, Ироқ, Франция, Буюк Британия, Германия, Бельгия, Эстония, Польша ва яна бошқа давлатлар Анқаранинг ушбу ҳаракатларини қоралаган.