Erdo‘g‘on Turkiyaning Suriyada harbiy harakatlarni amalga oshirishga haqi borligini ta’kidladi

Turkiya prezidenti Rajab Toyyib Erdo‘g‘on Anqaraning 1998-yilda imzolangan Adana kelishuviga muvofiq qo‘shni Suriya hududida harbiy operatsiyalar o‘tkazishga haqli ekanini ma’lum qildi. Turk yetakchisi bu haqda Yeni Safak gazetasiga bergan intervyusida ta’kidlab o‘tgan, deb yozmoqda “TASS”.

“Suriyada havo bo‘shlig‘idan foydalanish masalasiga kelsak, u AQShga tegishli emas. Bu xalqaro osmon va Suriyaga tegishli havo bo‘shlig‘i. Bo‘shliq AQShga tegishli emas ekan, demak undan foydalanishga Suriya hukumati (prezident Bashar Asad) haqliroq”, — deya ta’kidlagan Erdo‘g‘on.

Turkiya prezidentining so‘zlariga ko‘ra AQSh Suriya hududida hukumat tomonidan “chaqirilmagan mehmon”.

“Turkiya harbiy qo‘shinlari esa Suriya hududiga Anqara hamda Damashq o‘rtasidan tuzilgan Adana xalqaro kelishuvi doirasida kiritilgan. Ushbu bitimda agar mamlakat hukumati Kurdiston ishchi partiyasiga qarshi chora-tadbirlarni amalga oshira olmasa, u holda Turkiya harbiylari u yerdagi terrorchilarni yo‘q qilishi mumkinligi keltirib o‘tilgan” — deydi davlat rahbari.

Avval AQSh prezidenti Donald Tramp agar turklar Suriya shimoli-sharqidagi kurdlarni o‘ldirishni boshlasa, Turkiya iqtisodiyotini buzib tashlashini aytib o‘tgan. Shuningdek, Misr va Iroq davlat rahbarlari arab mamlakatlarini turklarning Suriyadagi harbiy harakatlariga to‘sqinlik qilishga urinishini bildirgan.

1980—1990-yillarda Turkiya hamda Suriya o‘rtasidagi munosabatlar ancha keskin bo‘lgan. Bu yillar davomida Anqara Damashqni Kurdiston ishchi partiyasini qo‘llab-quvvatlashda ayblagan. 1998-yil oktabrida inqiroz boshlangach, Turkiya Suriyaga 45 kun muddatda Kurdlar ishchi partiyasi ko‘magidan voz kechishni talab qilgan. Shu yili Suriya hukumati KIP yetakchisi Abdulloh O‘jalanni mamlakatdan surgun qilgan. 1998-yil 20-oktabrda Turkiya va Suriya tashqi ishlar va ichki ishlar vaziriliklari o‘rtasidagi muzokaralardan so‘ng xavfsizlik masalalari bo‘yicha Adana qo‘shma kelishuvi imzolangan.