Turkiyaning harbiy harakatlari sabab Suriyada 130 mingdan ortiq odam uylarini tark etdi

Tell-Obod hamda Ras al-Ayn tumanlarida yashovchi 130 ming nafardan ko‘proq odam Turkiyaning harbiy operatsiyasi sabab o‘z uylarini tark etishdi. Boshqa yerga ko‘chib o‘tayotgan fuqarolar soni 400 mingdan oshib ketishi mumkin, deya ta’kidlagan Birlashgan Millatlar Tashkilotining oliy komissari bosharmasining rasmiy vakili Yens Lerke. Bu haqda “RIA Novosti” xabar berdi.

“Suriya shimoli-sharqidagi Tell-Obod va Ras al-Ayn tumanlaridan aholining boshqa yerga ko‘chishi hali ham davom etmoqda. Taxminlarga ko‘ra, 130 mingdan oshiq odam o‘z uylarini tark etgan va bu hali bizgacha yetib kelgan eng aniq ma’lumot emas”, — deya ta’kidlagan Lerke.

Shuningdek, u 11-oktabr, juma kuni ushbu ikki tuman hududidagi davlat hamda xususiy shifoxonalarning barchasi yopilganligini ma’lum qildi. Gumanitar agentliklar ham harbiy harakatlar amalga oshirilayotgan hududlardagi o‘z xodimlarining xavfsizligidan xavotirga tushmoqda. Kamishlidagi aholi punktida BMTning 134 nafar xodimi qolib ketgan, ularning 124 nafar mahalliy, 10 nafari esa xorijlik mutaxassislar. Suriyaning ushbu hududida ishlovchi xorijlik xodimlarning soni 384 tadan 200 ga tushib qolgan.

Turkiya prezidenti Rajab Toyyib Erdo‘g‘on 9-oktabrda Suriya shimoli-sharqida Kurdiston ishchi partiyasi hamda IShID jangarilariga qarshi “Tinchlik bulog‘i” harbiy operatsiyasi boshlanganligini e’lon qilgan. Shu kuni Turkiya harbiy havo kuchlari Ras al-Ayn shahri va Suriyaning boshqa hududlariga havodan hujumlar uyushtirgan. Keyinchalik Turkiya qo‘shinining ushbu hududga bostirib kirgani xabar qilingan. Suriya hukumati Turkiyaning ushbu harakatlariga bir necha bor qarshilik qilishga urindi. Rossiya Turkiyani Suriyadagi vaziyatni yanada chigallashtirib yuborish xavfidan ogohlantirgan. Yevropa ittifoqi, AQSh, Eron, Misr, Iroq, Fransiya, Buyuk Britaniya, Germaniya, Belgiya, Estoniya, Polsha va yana boshqa davlatlar Anqaraning ushbu harakatlarini qoralagan.