Turkiya Bashar Asad hukumati bilan aloqalar qayta o‘rnatilishi mumkinligini inkor qildi

Turkiya tashqi ishlar vaziri Mevlyut Chavo‘sho‘g‘li Suriyaning amaldagi hukumati bilan muzokaralar o‘tkazilishi mumkinligini inkor etdi. Bu haqda “TASS” xabar berdi.

“Suriyada millionlab aholi vakillarini qirgan odamlar bilan nimani muhokama qilamiz? Prezident Bashar Asad hukumati Suriyani birlashtira olmaydi”, — deya CNN Turk jurnalistining Rossiyaning Damashq va Anqara o‘rtasida muloqot tashkil qilishga tayyorligi yuzasidan bergan savoliga javob qaytargan vazir.

Avval Rossiya tashqi ishlar vaziri Sergey Lavrov ruslarning Suriya va Turkiyaning, shuningdek, Damashq hamda kurdlar o‘rtasida muloqot tashkil qilishga tayyorligi va bu harakat har tomonlama foydali bo‘lishi mumkinligini ma’lum qilgan.

Turkiya hamda Suriya o‘rtasidagi diplomatik munosabatlarga 2011-yilda barham berilgan, shundan buyon mamlakat siyosatchilari Damashq bilan bu boradagi aloqalar qayta tiklanmasligini ta’kidlab keladi.