Бекободда боғча болалари овқатдан заҳарланди

Бекобод шаҳридаги 15-сонли мактабгача таълим муассасасида болалар овқатдан заҳарланди, деб хабар бермоқда Тошкент вилояти ҳокимлиги ахборот хизмати.

Маълум бўлишича, 27 сентябрь куни соат 09:30 ларда Бекобод шаҳридаги 15-сонли мактабгача таълим муассасасининг тарбиячилари 2 нафар тарбияланувчи ўзини нохуш ҳис қилаётганини сезган. Зудлик билан болалар мутахассис шифокор кўригидан ўтказилган. Тиббий текширув давомида, уларга овқатдан заҳарланишнинг дастлабки ташхиси қўйилган.

Ўз вақтида кўрилган чоралар натижасида муассасанинг қолган барча тарбияланувчилари тиббий текширувдан ўтказилди. Текширув мобайнида яна 9 нафар болада овқатдан заҳарланиш эҳтимоли аниқланган. Айни пайтда улар шаҳар юқумли касалликлар шифохонасига жойлаштирилган.

«Ҳозирги вақтда болаларнинг аҳволи қониқарли, вазият шифокорларнинг қатъий назорати остида», — дейилади хабарда.

Мазкур ҳолат бўйича ички ишлар ва прокуратура идоралари томонидан тегишли текширув ишлари олиб борилмоқда.

Эслатиб ўтамиз, Бекободдаги боғчада ўтган йили ҳам овқатдан заҳарланиш ҳолати қайд этилган. Ўшанда 8-мактабгача таълим муассасасида 59 нафар тарбияланувчи ва 3 ходим овқатдан заҳарланганди. Бунга боғчадаги музлаткичнинг носоз бўлгани ва санитария қоидаларига риоя этилмагани сабаб бўлганди. Ҳолат юзасидан Бекобод прокуратураси томонидан жиноий иш қўзғатилиб, боғча вақтинча ёпилганди.