Тошкент шаҳар ИИББ ЙҲХБ ходимлари томонидан пойтахтда йўл ҳаракати хавфсизлигини таъминлаш бўйича комплекс чора-тадбирлар ўтказилмоқда, деб хабар беради ИИББ матбуот хизмати.
Ҳозирда Тошкент шаҳрида йўл ҳаракати хавфсизлиги ойлиги эълон қилинган бўлиб, 25 сентябрь кунининг ўзида ЙПХ инспекторлари томонидан белгиланмаган жойда йўлни кесиб ўтиш ҳолати бўйича 31 та протокол тузилди.
Шунингдек, инспекторлар томонидан светофорнинг тақиқланган белгисида ҳаракатланган 116 нафар ҳайдовчи, маст ҳолатда транспорт воситасини бошқарган 11 нафар ҳайдовчи аниқланган. Бундан ташқари йўлнинг пиёдалар ўтиш жойида пиёдаларга йўл бермаган 225 та ҳолат қайд этилди. 25 сентябрь куни йўл ҳаракати қоидаларининг бузилишига оид жами 2302 та ҳолат аниқланди.
Пиёдаларнинг хавфсизлиги учун йўл инфратузилмаси, йўл белгиларининг ҳолатини доимий равишда кузатиб бориш муҳим. Бу ҳайдовчига пиёданинг кўринишини тезда аниқлаш ва унинг хавфсизлиги учун зарур чораларни кўриш имконини беради. Шу сабабли жорий йилнинг 11 апрелидан 25 сентябрига қадар 611 та йўл белгилари ўрнатилди, 1937 таси алмаштирилди, 995 таси қайта тикланган бўлса, 166 таси таъмирланди. Мунтазам равишда йўл белгилари янгиланмоқда. Ўтган давр мобайнида 1 023 065 квадрат метр йўл маркировка қилинган.
ИИББ ходимлари томонидан Тошкент шаҳрида пиёдалар иштирокида йўл-транспорт ҳодисалари сони кескин камайди. Масалан, 1 январдан 25 сентябрга қадар йўл-транспорт ҳодисалари ўтган йилнинг шу даврига нисбатан 14,4 фоизга камайган.
Изоҳ (0)