Ўзбекистонда фойда солиғи ставкаси 12 фоиздан 15 фоизга оширилиши бизнес яширин ҳолатда ишлашга ўтишига олиб келмаслиги кутилмоқда. Бу ҳақда Молия вазирининг ўринбосари Дилшод Султонов маълум қилди, дея хабар беради «Gazeta.uz».
Президент фармонига кўра, жорий йил 1 октябрдан қўшимча қиймат солиғи 20 фоиздан 15 фоизга туширилади. Шу билан бирга, 2020 йилда юридик шахсларнинг фойда солиғи базавий ставкасини 15 фоиз миқдорида белгилаш режалаштирилмоқда. Айни вақтда дивидендлар тариқасида тўланадиган даромадлар солиғи ставкаси 5 фоиз даражасида сақлаб қолинади.
Молия вазири ўринбосарининг таъкидлашича, йил бошидан фойда солиғи ва ягона ижтимоий тўловнинг пасайтирилиши бизнес легаллашувига туртки берди.
«Бизнес легаллашиб, олдин конвертда тўланган иш ҳақини кўрсатишни бошлади. 2 миллион сўмдан ошиқ маош оладиганлар сони кескин кўпайди. Агар олдинлари ишловчиларнинг 18 фоизи 2 миллион сўмдан ортиқ маош олган бўлса, ҳозирда бу кўрсаткич 25 фоизга етди», — деди Султонов.
Молия вазири ўринбосарининг қайд этишича, Ўзбекистонда фойда солиғи ставкаси 35, 24, 15, 5 ва 14 фоизни ташкил этган. Ҳозирги 12 фоизли ставка эса собиқ Иттифоқ ҳудудида энг пастлардан бири ҳисобланади. Жумладан, Қирғизистонда ушбу ставка 10 фоиз бўлса, қолган барча давлатларда 15—20 фоиз атрофида.
«Дивидендлардан олинадиган солиқ 5 фоиз миқдорида қолмоқда ва у собиқ Иттифоқ ҳудудидаги паст кўрсаткичлардан бири ҳисобланади. Жами фойда солиғи ставкаси эса 19,3 фоиз атрофида бўлади. Арманистон ва Қозоғистонда бу рақам 24, Озарбайжонда 28, Россияда 30,4 фоизга тенг», — таъкидлади Дилшод Султонов.
Изоҳ (0)