Bekobod shahridagi 15-sonli maktabgacha ta’lim muassasasida bolalar ovqatdan zaharlandi, deb xabar bermoqda Toshkent viloyati hokimligi axborot xizmati.
Ma’lum bo‘lishicha, 27-sentabr kuni soat 09:30 larda Bekobod shahridagi 15-sonli maktabgacha ta’lim muassasasining tarbiyachilari 2 nafar tarbiyalanuvchi o‘zini noxush his qilayotganini sezgan. Zudlik bilan bolalar mutaxassis shifokor ko‘rigidan o‘tkazilgan. Tibbiy tekshiruv davomida, ularga ovqatdan zaharlanishning dastlabki tashxisi qo‘yilgan.
O‘z vaqtida ko‘rilgan choralar natijasida muassasaning qolgan barcha tarbiyalanuvchilari tibbiy tekshiruvdan o‘tkazildi. Tekshiruv mobaynida yana 9 nafar bolada ovqatdan zaharlanish ehtimoli aniqlangan. Ayni paytda ular shahar yuqumli kasalliklar shifoxonasiga joylashtirilgan.
“Hozirgi vaqtda bolalarning ahvoli qoniqarli, vaziyat shifokorlarning qat’iy nazorati ostida”, — deyiladi xabarda.
Mazkur holat bo‘yicha ichki ishlar va prokuratura idoralari tomonidan tegishli tekshiruv ishlari olib borilmoqda.
Eslatib o‘tamiz, Bekoboddagi bog‘chada o‘tgan yili ham ovqatdan zaharlanish holati qayd etilgan. O‘shanda 8-maktabgacha ta’lim muassasasida 59 nafar tarbiyalanuvchi va 3 xodim ovqatdan zaharlangandi. Bunga bog‘chadagi muzlatkichning nosoz bo‘lgani va sanitariya qoidalariga rioya etilmagani sabab bo‘lgandi. Holat yuzasidan Bekobod prokuraturasi tomonidan jinoiy ish qo‘zg‘atilib, bog‘cha vaqtincha yopilgandi.
Izoh (0)