БМТнинг Нью-Йоркдаги штаб-квартирасида 60 дан ортиқ давлат ва ҳукумат раҳбарлари ҳамда қатор халқаро ташкилотлар вакиллари иштирок этган Иқлим ҳаракатлари бўйича саммит бўлиб ўтди. Бу ҳақда ТИВ матбуот хизмати хабар бермоқда.
Ўзбекистон делегациясини Олий Мажлис Қонунчилик палатаси спикер ўринбосари Бори Алихонов бошқарди.
Делегация томонидан мамлакатда ишлаб чиқилган саноатни модернизациялаш, энергосамарадорликни ошириш, қайта тикланувчи энергия манбаларини ривожлантиришга қаратилган Яшил иқтисодиётга ўтиш стратегияси доирасида Париж келишуви меъёрларини бажарилиши тўғрисида маълумот берилди.
Жумладан, жорий йил июль ойида қабул қилинган «Қайта тикланувчи энергия манбаларидан фойдаланиш тўғрисида»ги қонунга мувофиқ, 2025 йилга келиб бундай манбаларнинг энергетика қувватларидаги улушини 20 фоизгача етказиш режалаштирилмоқда.
Халқаро энергетика агентлиги маълумотларига кўра, Ўзбекистонда 2010—2016 йиллар давомида ёқилғи ишлатилиши туфайли ҳосил бўлган карбонат ангидрид гази ташланмалари 97,6 миллион тоннадан 85,3 миллион тоннагача камайган. Ўзбекистон шу тариқа 2030 йилга келиб бундай ташланмалар ҳажмини 10 фоизга камайтиришга эришиши кутилмоқда ва бу мамлакат зиммасига олган мажбуриятларга мос келади.
Хорижлик ҳамкорларга, шунингдек, 25 октябрда БМТ шафеълигида Нукусда ўтказилиши режалаштирилган «Оролбўйи — экологик инновациялар ва технологиялар ҳудуди» халқаро анжумани ҳақида маълумотлар тақдим этилди.
Изоҳ (0)