«Халқ банки» Бўка филиали бошқарувчисининг биринчи ўринбосари З.Х. тумандаги «М-Б» деҳқон хўжалигига тегишли бўлган муҳр, штамп ва бошқа ҳужжатларни алдов йўли билан қўлга киритиб, сохта ҳужжатлар билан жами 7,1 миллиард сўмлик товар айланмасини амалга оширгани аниқланди. Бу ҳақда Бош прокуратура матбуот хизмати хабар берди.
Бош прокуратура ҳузуридаги Иқтисодий жиноятларга қарши курашиш департаментининг Бўка тумани бўлими томонидан тадбиркорлик субъектлари ҳуқуқ ва манфаатларини ҳимоя қилиш юзасидан ўтказилган текширув натижаларига кўра, З. Х. акаси V. Х. билан 1,3 миллиард сўмлик солиқ ва бошқа мажбурий тўловларни тўлашдан қасддан бўйин товлаб келган.
Шунингдек, З.Х. мансаб ваколатини суиистеъмол қилиб, онаси ва амакиси номига 15 миллион сўмдан жами 30 миллион сўм имтиёзли кредит расмийлаштириб, мазкур пул маблағларини «М-Б» деҳқон хўжалиги ҳисоб-рақамига ўтказиб, ўзлаштириш йўли билан талон-торож қилган.
Бундан ташқари, З.Х. ва бошқалар 317,7 миллион сўм пул маблағларини молиявий ёрдам сифатида турли хўжалик юритувчи субъектларга ўтказиб нақдлаштириб олганлиги, АТ «Халқ банки»нинг лотереяларини олиш учун «М-Б» деҳқон хўжалиги ҳисобидан 141,4 миллион сўмни ўтказиб, лотереяларни бозорларда нақд пулга сотганлиги аниқланиб, жами 459,1 миллион сўм нақд пул маблағларини банк муассасасига топширмасдан, автомашина сотиб олиш учун олинган кредит тўловларини тўлашга ва турар жой сотиб олишга сарфлаб, жиноий фаолиятдан олинган даромадларни легаллаштирган.
Мазкур ҳолатлар юзасидан З.Х. ва бошқаларга нисбатан ЖКнинг 167, 168, 179, 209 ва 243-моддалари билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)