Шарқий ҳарбий округда «Маънавият ҳафталиги» доирасида 75 нафар ҳарбий хизматчининг оиласи иш билан таъминланди

Мудофаа вазирининг ўринбосари генерал майор Азизбек Икрамовнинг ташаббуси ва кўрсатмасига асосан Шарқий ҳарбий округ қўшинлари қўмондонлиги тасарруфидаги ҳарбий қисм ва бўлинмаларда «Маънавият ҳафталиги» эълон қилинди. Бу ҳақда Мудофаа вазирлиги ахборот ва оммавий коммуникациялар департаменти «Дарё»га маълум қилди.

25 сентябрь куни Андижон шаҳрида жойлашган ҳарбий қисмда Мудофаа вазирлиги тарбиявий ва мафкуравий ишлар бош бошқармаси бошлиғи полковник Акмал Ортиқов, Мудофаа вазирлиги ҳузуридаги Жамоатчилик кенгаши Андижон вилояти минтақавий бўлинмаси раиси, Андижон вилояти ҳокимининг ўринбосари Манзура Юнусова, минтақавий бўлинма аъзолари ва ҳарбий хизматчилар иштирокида давра суҳбати ўтказилди.

Ўтказилган давра суҳбатида кенгашнинг вазифалари ва ҳозирги кундаги иш фаолияти таҳлил қилиниб, тегишли кўрсатмалар берилди. Шунингдек, Ўзбекистон Президенти томонидан илгари сурилган 5 та муҳим ташаббус бўйича амалга оширилаётган амалий ишлар, ҳарбий хизматчилар оила аъзоларининг ижтимоий ҳимояси ва маънавиятини янада ошириш масалаларига ҳам алоҳида эътибор қаратилди.

Ҳарбий шаҳарчаларда тадбиркорликни қўллаб-қувватлаш ва 5 та муҳим ташаббуснинг бири бўлган хотин-қизлар бандлигини таъминлаш мақсадида Мудофаа вазирлиги, Андижон вилояти ҳарбий-маъмурий сектори ҳамда Шарқий ҳарбий округ қўшинлари қўмондонлиги билан ҳамкорликда Андижон гарнизонидаги 20-сонли ёпиқ ҳарбий шаҳарча ҳудудида 3 гектар ер ажратилиб, «Ал-Ҳаким» МЧЖ таркибида тикувчилик цехи ташкил этилди.

Мазкур тикувчилик цехида 150 кишилик иш ўрни яратилиб, маҳаллий аҳоли билан биргаликда Андижон гарнизонидаги ҳарбий қисмда хизмат қилаётган ҳарбий хизматчиларнинг 75 нафар оила аъзолари доимий иш билан таъминланди.Шу билан бирга, ҳозирда «Ал-Ҳаким» МЧЖ раҳбари томонидан амалга оширилаётган ишларнинг амалий давоми сифатида шу ҳудуднинг ўзида яна 150 иш ўринли цех қурилиши ишлари амалга оширилмоқда.

Мазкур цех ишлаб чиқараётган трикотаж маҳсулотлари Қозоғистон ва Беларусга экспорт қилинади. Мудофаа вазирлиги томонидан бу ишлар давом эттирилиб, бошқа ҳарбий округларда ҳам босқичма-босқич «Маънавият ҳафталиги» ташкил этилиб, юқоридаги каби масалаларга алоҳида эътибор қаратилиши режалаштирилган.