«Ўзбекистон» меҳмонхонасининг улушлари нархи учинчи бор арзонлашди. Бу ҳақда Давлат активларини бошқариш агентлиги хабар берди.
Энди «Ўзбекистон» МЧЖ қўшма корхонасининг 80,13 фоизли меҳмонхона бошқаруви ҳуқуқини тақдим этадиган пакети 23,1 миллион АҚШ долларига баҳоланди. Биринчи марта нарх июль ойи охирида арзонлашган (ўшанда дастлабки нарх 33 миллион АҚШ доллари бўлган ва харидор топилмагач 29,7 миллионга туширилган), иккинчи пасайиш август охирида (26,4 миллион АҚШ доллари) кузатилди.
Назорат пакети февраль бошида сотувга қўйилган. Меҳмонхонани сотиш қарори ўтган йилнинг августида чиқарилганди. Харидор корхона ҳудуддаги ерлар, инфратузилма объектлари ва «Ўзбекистон» комплекси биносидан 99 йил давомида фойдаланиш ҳуқуқига (тасарруф этиш ҳуқуқисиз) эга бўлади.
Тўловни амалга оширишнинг максимал муддати — уч йил. Харидор икки йил ичида 100 миллиард сўм миқдорида сармоя киритиш масъулиятини ўз зиммасига олади. Бу пуллар меҳмонхонани қайта таъмирлаш ва модернизация қилишга сарф этилади.
Меҳмонхонанинг янги эгаси 10 йил ичида корхонанинг асосий меҳмонхона хизмат кўрсатиш фаолиятини сақлаб туриши, бинонинг ташқи кўринишини ўзгартирмаслиги ва бошқарувга энг илғор менежерларни жалб этиши лозим. Танловда иштирок этиш учун дастлабки нархнинг 15 фоизидан кам бўлмаган олдиндан тўловни амалга ошириш талаб этилади.
Яқин орада билдирилган таклиф пакетларини очиш 14 октябрда ўтказилади.
Тошкентнинг энг машҳур меҳмонхоналаридан бири бўлган «Ўзбекистон» 1974 йилда қурилган. Бу тўрт юлдузли меҳмонхона пойтахтнинг энг диққатга сазовор масканларидан бири, рамзи ҳисобланади. Меҳмонхонадаги номерлар сони 223 тани ташкил этади.
Изоҳ (0)