Тошкент шаҳар ИИББ Telegram каналларида Мирзо Улуғбек туманининг «Яланғоч» даҳасидаги дарахтлар ноқонуний равишда кесилаётгани ҳақида тарқалган хабарларга муносабат билдирди.
Аниқланишича, 5 июль куни 9 ва 129-уйларнинг аҳолиси «Шаҳриобод» маҳалла фуқаролари йиғинига қуриган чинорлар ва уларнинг шохларини кесиш бўйича, шунингдек, «Маданият» МФЙ раиси 5 сентябрь куни 101, 129, 130, 100А, 102А, 103А ва 111А сонли уйларнинг яқинидаги 50 та дарахтнинг шохларини кесиш бўйича Ягона интерактив давлат хизматлари порталига мурожаат қилган.
12 сентябрь куни Мирзо Улуғбек туман ҳокими ўринбосари дарахтларни кесиш бўйича рухсатномага имзо чеккан.
23 сентябрь куни соат 11:00 да «Яланғоч» мавзесида 5 та қуриб қолган дарахт ва бошқа дарахтларнинг шохлари кесилган.
Тармоқларда сурати тарқалган MAN маркасидаги автомобиль эса ободонлаштириш бошқармасига тегишли. Ҳайдовчи ўз ишини кўрсатмаларга мувофиқ бажарган.
Шунингдек, 24 сентябрь куни Мирзо Улуғбек тумани навбатчилик қисмига 47 ёшли фуқародан мурожаат келиб тушган. У Олтинтепа кўчасида жойлашган уйининг олдида дарахтлар ноқонуний кесилаётганини билдирган. ИИБ ҳамда ФВВ ходимлари воқеа жойига етиб бориб, Давлат ўрмон фондига кирмайдиган буталар қирқилаётгани, ҳудудда ободонлаштириш ишлари олиб борилаётганини аниқлаган.
ИИББ фуқароларни вазиятни билмай туриб, интернет тармоқлари орқали кескин фикрлар билдирмасликка чақиради.
Изоҳ (0)