Фарғонада бадгумон эр хотинини асоссиз пичоқлади. Экспертиза унинг руҳиятида бузилиш аниқлади

Фарғона вилояти Қува тумани «Гўзал» маҳалласида яшовчи Х.К. рафиқаси М.К.ни хиёнатда айблаб, пичоқлаган.

Бош прокуратура матбуот хизматининг «Дарё»га хабар беришича, хиёнатда айблаш асос бўлиб Х.К. руҳиятида ўзгариш юз бергани воқеага сабаб бўлган. У рафиқаси М.К.нинг турли жойларига хўжалик пичоғи билан бир неча маротаба уриб тан жароҳати етказган.

Аёл ёрдам сўраб бақирганида, овозини эшитган овсини ҳовлига югуриб чиққан ва Х.К.ни тўхтатиб қолган. М.К. оғир аҳволда шифохонага ётказилган. Бош прокуратура шифокорлар унинг ҳаётини сақлаб қолганини маълум қилган.

Ҳолат юзасидан Х.К.га нисбатан Жиноят кодексининг 25, 97-моддаси 1-қисми билан жиноят иши қўзғатилган. Айни дамда тергов ҳаракатлари олиб борилмоқда.