Ўзбекистон ташқи ишлар вазири Абдулазиз Комилов 24 сентябрь, сешанба куни Нью-Йоркда Бирлашган Араб Амирликлари (БАА) ташқи ишлар ва халқаро ҳамкорлик вазири Шайх Абдулла бин Зоид Ал Наҳаён билан учрашди.
«Музокараларда икки томонлама муносабатлар, шунингдек, БМТ, ИҲТ ва бошқа тузилмалар доирасидаги ўзаро муносабатларнинг ҳолати ва ривожлантириш истиқболлари муҳокама қилинди», — дейилади ТИВ ахборотида.
Учрашувда ҳамкорликнинг ҳозирги ҳолати ва истиқболларини муҳокама қилиш ва халқаро муаммолар юзасидан фикр алмашиш имконини берувчи икки мамлакат ташқи ишлар вазирликлари ўртасидаги сиёсий маслаҳатлашувларнинг навбатдаги раундини ўтказиш бўйича таклифлар кўриб чиқилган.
Сўнгги мажлиси 2019 йил март ойида Тошкентда бўлиб ўтган Савдо-иқтисодий, инвестицион-молиявий ҳамкорлик бўйича ҳукуматлараро қўшма комиссиянинг соҳадаги аниқ тадбирлар, дастурлар ва лойиҳаларни илгари суришдаги алоҳида ўрни қайд этилган.
Томонлар сиёсий, савдо-иқтисодий, инвестицион, туристик, маданий-гуманитар ва бошқа соҳалардаги ҳамкорликни кенгайтиришдан манфаатдор эканлигини ва бунинг учун сезиларли салоҳият мавжудлигини тасдиқлаган.
Ташқи ишлар вазирлиги матбуот хизматининг қўшимча қилишича, суҳбатда, шунингдек, турли даражаларда бўлажак икки томонлама учрашувларнинг вақти ва кун тартибига оид таклифлар кўриб чиқилган.
Изоҳ (0)