Ўзбекистон ташқи ишлар вазири Абдулазиз Комилов 24 сентябрь, сешанба куни БМТ Бош Ассамблеяси 74-сессияси доирасида Нью-Йоркда АҚШ Давлат котибининг Жанубий ва Марказий Осиё бўйича ёрдамчиси вазифасини бажарувчи Элис Уэллс билан учрашди.
Ўзбекистон Ташқи ишлар вазирлигидан маълум қилишларича, учрашувда ўз ишини якунлаган «Марказий Осиё—АҚШ» («C5+1») шаклидаги навбатдаги вазирлар учрашувининг натижалари юзасидан фикр алмашилган. Ушбу учрашув кўп томонлама ҳамкорликни ривожлантиришнинг истиқболли йўналишларини конструктив руҳда муҳокама қилиш имконини бергани қайд этилган.
«Элис Уэллс икки томонлама муносабатларнинг бугунги ҳолатини юқори баҳолар экан, уларни ‘тўлақонли ва кенг қамровли’ дея баҳолади. Дипломат Ўзбекистонда инсон ҳуқуқларини ҳимоя қилиш, фуқаролик жамияти институтлари билан ўзаро ҳамкорлик соҳасида эришилган ютуқларни олқишлади ва ҳозирги ўзгариш динамикаси давом этишига умид билдирди», — дейилади ТИВ ахборотида.
Учрашув давомида афғонлараро тинчлик жараёнини илгари суриш масалалари алоҳида муҳокама қилинган, Афғонистонни иқтисодий, ижтимоий ва инфратузилмавий қайта тиклаш бўйича саъй-ҳаракатларни жипслаштириш муҳимлиги таъкидланган.
Изоҳ (0)