АҚШ расмийлари Олий Мажлис депутатлари томонидан янги таҳрирдаги «Виждон эркинлиги ва диний ташкилотлар тўғрисида»ги қонуннинг кўриб чиқилиши бошланганлигини олқишлади. Бу ҳақда Ўзбекистон Ташқи ишлар вазирлиги матбуот хизмати хабар берди.
Ўзбекистонда «Виждон эркинлиги ва диний ташкилотлар тўғрисида»ги қонун 1991 йилда қабул қилинган, унга сўнгги ўзгартишлар 1998 йилда киритилган. Қонуннинг диний ташкилотларни рўйхатга олиш тартибига қатор ўзгартиришлар киритишини назарда тутувчи янги таҳрири сентябрь ойида Қонунчилик палатасига қабул қилиш учун тақдим этилган эди.
БМТ Бош ассамблеясининг 74-сессиясида иштирок этаётган Ўзбекистон делегациясига бошчилик қилаётган мамлакат ташқи ишлар вазири Абдулазиз Комилов Нью-Йоркда АҚШнинг халқаро диний эркинликлар соҳасидаги махсус топшириқлар бўйича элчиси Самюэль Дейл Браунбэк билан учрашди.
«Самюэль Дейл Браунбэк Олий Мажлис депутатлари томонидан янги таҳрирдаги ‘Виждон эркинлиги ва диний ташкилотлар тўғрисидаъги қонуннинг кўриб чиқилиши бошланганлигини олқишлади. Элчи қонун лойиҳасининг диний эътиқод эркинлигига амал қилиш масалалари борасидаги илғор чет эл тажрибаси ва халқаро стандартларни ўзида акс эттиришига умид билдирди», — дейилади ТИВ ахборотида.
Абдулазиз Комилов мулоқот давомида суҳбатдошининг эътиборини Ўзбекистон ҳукумати элчининг 2018 йил сентябрида Тошкентга ташрифи, шунингдек, Ўзбекистон делегациясининг 2018—2019 йилларда жаҳонда диний эркинликни илгари суриш бўйича Вашингтонда бўлиб ўтган биринчи ва иккинчи вазирлар конференцияларида иштироки натижаларига кўра эришилган келишувларни амалга оширишга содиқлигига қаратди.
ТИВ маълумотларига кўра, Ўзбекистон делегациясининг АҚШга ташрифи доирасида диний эркинликларни ҳимоя қилиш учун Глобал чорловга бағишланган юқори даражали конференцияда ҳамда етакчи Америка компаниялари иштирокида диний эркинликлар масалалари бўйича давра суҳбатида иштирок этиш ҳам режалаштирилган эди.
«Gazeta.uz»нинг эслатишича, «Виждон эркинлиги ва диний ташкилотлар тўғрисида»ги қонуннинг амалдаги таҳрири БМТнинг дин ва эътиқод эркинлиги масалалари бўйича махсус маърузачиси Аҳмад Шаҳид томонидан унинг 2017 йил октябрида Ўзбекистонга қилган сафари якунларига кўра танқид остига олинган эди.
Изоҳ (0)