26 сентябрь, пайшанба куни Нукусда «Барқарор қишлоқ ҳудудлари ривожланишини қўллаб-қувватлаш орқали Оролбўйи минтақасида инсон хавфсизлигининг долзарб муаммоларини ҳал қилиш» қўшма лойиҳасини ишга тушириш маросими бўлиб ўтди. Бу ҳақда Ўзбекистондаги Бирлашган Миллатлар Ташкилотининг Тараққиёт Дастури матбуот хизмати хабар берди.
Бу БМТнинг Ўзбекистондаги Оролбўйи минтақаси учун Инсон хавфсизлиги бўйича кўпшериклик траст фонди (ИХКТФ) томонидан молиялаштирилаётган биринчи лойиҳа бўлиб, унинг бюджети 1 463 900 АҚШ долларига тенг.
Лойиҳанинг мақсади минтақадаги энг заиф жамоаларда Орол денгизи инқирози натижасида вужудга келган экологик, ижтимоий ва иқтисодий оқибатларни юмшатишдир. Асосий тадбирлар шу йўналишда ечимлар мажмуасини ишлаб чиқиш, Қорақалпоғистоннинг Тахтакўпир, шунингдек, Мўйноқ ва Чимбой туманларида аҳоли учун ижтимоий хизматлардан фойдаланиш имконларини яратиш, турмуш даражасини ошириш ва барқарор туризмни ривожлантиришга қаратилган.
«Оролбўйи минтақасига кўмак кўрсатиш масалалари БМТТД учун муҳим аҳамиятга эга, биз минтақадаги иштирокимизни кенгайтириш бўйича ишларни давом эттирамиз.
Ушбу йўналишдаги ҳамкорликка янгича ёндашув Ўзбекистон Президентининг Оролбўйи ҳудудида экологик инновациялар ва технологиялар зонасини яратиш ташаббусига асосланади. Шу нуқтаи назардан, БМТТД минтақада Барқарор Тараққиёт Мақсадларига эришиш учун инновацион ечимларни амалга ошириш бўйича жаҳон тажрибасини таклиф этади», — деди БМТ Тараққиёт дастурининг Ўзбекистондаги доимий вакили Матилда Димовска маросим иштирокчиларига қаратилган табрик нутқида.
Лойиҳани амалга ошириш натижасида 2230 дан ортиқ қишлоқ аҳолисига ичимлик суви етказиб берилади, 1000 дан ортиқ заиф жамоаларнинг вакиллари кичик ва ўрта бизнесда, шунингдек, экотуризм соҳасида даромад олиш имкониятларини кенгайтирадилар. Орол денгизининг қуриган тубида ўрмонзор барпо этиш орқали иқлим ўзгаришига мослашишда ҳам кўмак кўрсатилади.
ИХКТФ лойиҳавий таклифлари учун аризалар дастлабки қабул қилиниши жорий йил бошида эълон қилинган эди. Бунда устувор йўналишлар сифатида экологик хавфсизликни таъминлаш, соғлиқни сақлаш соҳасида хавфсизликни таъминлаш ҳамда ижтимоий хавфсизликни таъминлаш, шу жумладан, асосий коммунал хизматлардан, ижтимоий ҳимоя, сув таъминоти, санитария ва таълим соҳаларидан фойдалана олиш имкониятини яхшилаш белгиланган эди.
Жамғарма фаолиятида иштирок этувчи ташкилотлар томонидан умумий қиймати 4,23 миллион АҚШ доллари қийматига эга бешта лойиҳа тақдим этилган эди. Ҳукумат, БМТ ташкилотлари, донорлар — Европа Иттифоқининг Ўзбекистондаги делегацияси, Япония элчихонаси, маҳаллий ННТ вакилларидан иборат Бошқарув кенгаши томонидан лойиҳа таклифлари ўрганиб чиқилгандан сўнг умумий қиймати 3,085 миллион АҚШ долларига тенг иккита лойиҳа тасдиқланди.
Орол денгизи минтақаси учун ИИТФБ халқаро ҳамкорликни ривожлантириш ва донорлик ҳамжамиятининг маблағларини сафарбар этиш орқали экологик, иқтисодий, озиқ-овқат, ижтимоий хавфсизликни таъминлаш, аҳоли саломатлигини яхшилаш учун ноёб ягона платформа ҳисобланади.
Изоҳ (0)