20 августнинг эътиборга молик янгиликлари — «Дарё» дайжестида.
Бугундан Ўзбекистон Президенти Шавкат Мирзиёевнинг Қорақалпоғистон Республикасига икки кунлик ташрифи бошланди.
Давлат раҳбари Мўйноқ туманига келиб, Амударё делтасида кичик сув ҳавзаларини барпо этиш бўйича олиб борилаётган ишлар билан танишди.
Шунингдек, Президент «Мўйноқ порлоқ текс» масъулияти чекланган жамиятида бўлди. Сўнгра «Мўйноқ аква саноат» давлат унитар корхонасига борди. Шундан сўнг Шавкат Мирзиёев Мўйноқ туманидаги маданият марказида қорақалпоғистонлик фаоллар билан мулоқот қилди.
***
Нью-Йоркда ўзбекистонлик полициячи Садоқат Мақсудова қимматбаҳо кийимларнинг пулини тўламасдан дўкондан чиқиб кетаётганида қўлга олинди.
Қайд этилишича, 24 ёшли полиция хизматчиси Садоқат Мақсудова 15 август куни Статен Исланд савдо мажмуасидан 300 долларлик кийим-кечакнинг пулини бермасдан чиқиб кетаётганида ушланган.
Хабарда Мақсудова майда ўғирликда айбланиб, хизматидан вақтинча четлатилгани ёзилган. Садоқат Мақсудованинг ўзи эса ўғирлик қилганини рад қилмоқда.
***
Марказий банк раиси Мамаризо Нурмуродов деноминация (пул қийматини ўзгартириш) бўлмаслигини маълум қилди.
«Деноминация оддийгина нолларни ўчириш эмас, катта иқтисодий харажат. Биз деноминация қилмоқчи эмасмиз. Марказий банк раиси сифатида айтмоқчиман, деноминация ҳеч кимнинг хаёлида йўқ», — деган у.
***
«Пул топиш учун ҳаммасига розиман, фақат фоҳишаликка эмас!» Официантлик қилаётган Ўзбекистон чемпионининг ҳикояси.
«Дарё» ижтимоий ҳаётда ўз ўрнига эга, бироқ жамоатчилик эътиборидан кўпинча четда қоладиган касб эгалари билан суҳбат қилди. Лойиҳанинг бу галги қаҳрамони официантлик қилаётган қиз.
«Исмим Мадина. Яқинда 23 ёшга тўламан. Оилада 2 та қизмиз: опам ва мен. Онам бизни бир ўзи катта қилган. Ҳозир шаҳар ободонлаштириш бўлимида ишлайди. Ўтган йили ўқишга топшириб, шартнома асосида ўқишга кирдим, лекин шароитимиз йўқлиги учун ўқий олмадим. Кейин онамнинг ёнида ишлай бошладим. Ўтган йили банкдан катта кредит олиб, опамни турмушга узатдик. Шунинг учун яна қўшимча иш топишга тўғри келди. Ҳозир шаҳарни марказида жойлашган кафеда официантлик қиляпман», — дейди ҳикоя қаҳрамони.
***
Ўзбекистон банкларида нақд доллар сотилиши бошланди.
Чет эл валютасини валюта айирбошлаш шохобчаларида сотиб олиш мумкин.
Бугунги кунда доллар сотиб олиш курси — 9350 сўм, сотув — 9450 сўм.
***
Ўзбекистонда бачадон бўйни саратонининг олдини олиш чораси топилди.
ЖССТ маълумотларига кўра, Ўзбекистонда ҳар йили 1660 нафар аёл бачадон бўйни саратони касаллигига чалинмоқда.
Бунинг олдини олиш бўйича Ўзбекистонда 2017 йилда Вазирлар Маҳкамаси томонидан миллий режа тасдиқланган. У ўз ичига бачадон бўйни саратонини даволаш, паллиатив ёрдам кўрсатиш билан бирга, ОПВга қарши эмлаш, бачадон бўйни саратонини скрининг қилиш каби бирламчи профилактик тадбирларни қамраб олади.
Миллий эмлаш календарига кўра, Ўзбекистонда болалар давлат бюджети ҳисобидан 12 та бошқариладиган инфекцияга қарши эмланади. Эндиликда ОПВга қарши вакцинанинг жорий қилиниши эса яна бир оғир касаллик — бачадон бўйни саратони касаллигининг олдини олишга хизмат қилади.
Изоҳ (0)