Комил Алламжонов давлат идоралари матбуот котиблари қандай синовлар асосида лавозимга тайинлаши ҳақида маълумот берди

Ахборот ва оммавий коммуникациялар агентлиги директори Комил Алламжонов давлат идоралари матбуот котиблари қандай синовлар асосида лавозимга тайинлаши ҳақида маълумот берди.

Қадрли дўстлар, сиз билан мулоқот йўлга қўйилганидан буён менга ёзаётган фикрларингизни мунтазам ўқиб бормоқдаман.

Менга давлат идоралари матбуот котиблари қандай синовлар асосида лавозимга тайинлаши ва бу жараёнда Агентлигимизнинг иштироки, холислик қай даражада таъминланиши ҳақида сўраб, кўп мурожаат йўллашяпти. Шу мавзудаги саволлар ҳозирга қадар такрорланаётгани учун уларга жавоб бермоқчиман.

Президент қарорида (http://lex.uz/docs/4390513) давлат ахборот сиёсатини амалга оширишда матбуот хизматларининг биринчи ахборот манбаи сифатидаги ўрнини мустаҳкамлаш масалаларига алоҳида эътибор қаратилган.

Қарор билан ахборот хизмати раҳбари бир вақтнинг ўзида давлат органи раҳбарининг матбуот котиби — ахборот сиёсати масалалари бўйича маслаҳатчиси мақомида бўлиши ҳамда Ахборот ва оммавий коммуникациялар агентлиги хулосасини инобатга олган ҳолда, лавозимга тайинланиши белгиланган.

Ҳозирга қадар Президент қарори талабларига асосан Агентликда 58 та давлат ва хўжалик бошқаруви органи томонидан матбуот котиби лавозимига тавсия этилган 60 та номзод билан суҳбат ташкил этилди.

Шулардан 41 таси суҳбатдан мувафаққиятли ўтди ҳамда раҳбарнинг матбуот котиби лавозимига лойиқ деб топилиб, уларга Агентлик тавсиялари берилди. 11 та номзод суҳбатдан шартли равишда ўтди. 6 та номзод эса суҳбатдан ўта олмади.

Таъкидлашим керакки, холисликни таъминлаш мақсадида суҳбатларни юқори билим ва салоҳиятга эга масъул мутасаддилар, тажрибали ва ўз ишига виждонан ёндашадиган соҳа мутахассисларидан иборат ҳайъат олиб борди.

Суҳбатдан ўтган барча номзодларни самимий қутлаб, мамлакатимизда давлатимиз раҳбари томонидан изчиллик билан олиб борилаётган очиқлик сиёсатига астойдил хизмат қилишлари, республикамизнинг халқаро майдондаги имижини муносиб тарзда янада юксалтириш борасидаги саъй-ҳаракатларида муваффақият тилайман.

Комил Алламжонов, Ахборот ва оммавий коммуникациялар агентлиги директори