20-avgustning e’tiborga molik yangiliklari — “Daryo” dayjestida.
Bugundan O‘zbekiston Prezidenti Shavkat Mirziyoyevning Qoraqalpog‘iston Respublikasiga ikki kunlik tashrifi boshlandi.
Davlat rahbari Mo‘ynoq tumaniga kelib, Amudaryo deltasida kichik suv havzalarini barpo etish bo‘yicha olib borilayotgan ishlar bilan tanishdi.
Shuningdek, Prezident “Mo‘ynoq porloq teks” mas’uliyati cheklangan jamiyatida bo‘ldi. So‘ngra “Mo‘ynoq akva sanoat” davlat unitar korxonasiga bordi. Shundan so‘ng Shavkat Mirziyoyev Mo‘ynoq tumanidagi madaniyat markazida qoraqalpog‘istonlik faollar bilan muloqot qildi.
***
Nyu-Yorkda o‘zbekistonlik politsiyachi Sadoqat Maqsudova qimmatbaho kiyimlarning pulini to‘lamasdan do‘kondan chiqib ketayotganida qo‘lga olindi.
Qayd etilishicha, 24 yoshli politsiya xizmatchisi Sadoqat Maqsudova 15-avgust kuni Staten Island savdo majmuasidan 300 dollarlik kiyim-kechakning pulini bermasdan chiqib ketayotganida ushlangan.
Xabarda Maqsudova mayda o‘g‘irlikda ayblanib, xizmatidan vaqtincha chetlatilgani yozilgan. Sadoqat Maqsudovaning o‘zi esa o‘g‘irlik qilganini rad qilmoqda.
***
Markaziy bank raisi Mamarizo Nurmurodov denominatsiya (pul qiymatini o‘zgartirish) bo‘lmasligini ma’lum qildi.
“Denominatsiya oddiygina nollarni o‘chirish emas, katta iqtisodiy xarajat. Biz denominatsiya qilmoqchi emasmiz. Markaziy bank raisi sifatida aytmoqchiman, denominatsiya hech kimning xayolida yo‘q”, — degan u.
***
“Pul topish uchun hammasiga roziman, faqat fohishalikka emas!” Ofitsiantlik qilayotgan O‘zbekiston chempionining hikoyasi.
“Daryo” ijtimoiy hayotda o‘z o‘rniga ega, biroq jamoatchilik e’tiboridan ko‘pincha chetda qoladigan kasb egalari bilan suhbat qildi. Loyihaning bu galgi qahramoni ofitsiantlik qilayotgan qiz.
“Ismim Madina. Yaqinda 23 yoshga to‘laman. Oilada 2 ta qizmiz: opam va men. Onam bizni bir o‘zi katta qilgan. Hozir shahar obodonlashtirish bo‘limida ishlaydi. O‘tgan yili o‘qishga topshirib, shartnoma asosida o‘qishga kirdim, lekin sharoitimiz yo‘qligi uchun o‘qiy olmadim. Keyin onamning yonida ishlay boshladim. O‘tgan yili bankdan katta kredit olib, opamni turmushga uzatdik. Shuning uchun yana qo‘shimcha ish topishga to‘g‘ri keldi. Hozir shaharni markazida joylashgan kafeda ofitsiantlik qilyapman”, — deydi hikoya qahramoni.
***
O‘zbekiston banklarida naqd dollar sotilishi boshlandi.
Chet el valyutasini valyuta ayirboshlash shoxobchalarida sotib olish mumkin.
Bugungi kunda dollar sotib olish kursi — 9350 so‘m, sotuv — 9450 so‘m.
***
O‘zbekistonda bachadon bo‘yni saratonining oldini olish chorasi topildi.
JSST ma’lumotlariga ko‘ra, O‘zbekistonda har yili 1660 nafar ayol bachadon bo‘yni saratoni kasalligiga chalinmoqda.
Buning oldini olish bo‘yicha O‘zbekistonda 2017-yilda Vazirlar Mahkamasi tomonidan milliy reja tasdiqlangan. U o‘z ichiga bachadon bo‘yni saratonini davolash, palliativ yordam ko‘rsatish bilan birga, OPVga qarshi emlash, bachadon bo‘yni saratonini skrining qilish kabi birlamchi profilaktik tadbirlarni qamrab oladi.
Milliy emlash kalendariga ko‘ra, O‘zbekistonda bolalar davlat budjeti hisobidan 12 ta boshqariladigan infeksiyaga qarshi emlanadi. Endilikda OPVga qarshi vaksinaning joriy qilinishi esa yana bir og‘ir kasallik — bachadon bo‘yni saratoni kasalligining oldini olishga xizmat qiladi.
Izoh (0)