Жорий йилнинг 24 июнь куни Олий Мажлис Қонунчилик палатасида «Жиноят-ижроия қонунчилиги такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳаси муҳокама қилинди. Бу ҳақда Қонунчилик муаммолари институти хабар берди.
Унда депутатлар, мутасадди ташкилотларнинг масъул ходимлари, Қонунчилик муаммолари ва парламент тадқиқотлари институти ҳамда оммавий ахборот воситалари вакиллари иштирок этди.
Қонунчилик ташаббуси ҳуқуқи субъекти томонидан Қонунчилик палатасига киритилган мазкур қонун лойиҳаси манзил-колонияларида жазони ўтаётган озодликдан маҳрум этишга ҳукм қилинган шахсларга пенсия тўлашни назарда тутади.
Қонун лойиҳаси Қонунчилик палатасининг Мудофаа ва хавфсизлик масалалари, Меҳнат ва ижтимоий масалалар қўмиталари ҳамда Қонунчилик муаммолари ва парламент тадқиқотлари институти томонидан чуқур ўрганиб чиқилди.
Муҳокама жараёнида депутатлар томонидан нафақат манзил-колонияларидаги, балки барча жазони ижро этиш муассасаларида жазосини ўтаётган пенсионер шахсларга пенсия тўлаш тартибини жорий этиш масаласини кўриб чиқиш таклифи илгари сурилди. Уларнинг фикрича, Конституцияга мувофиқ, ҳар ким учун ижтимоий таъминот олиш ҳуқуқи кафолатланади. Қонун лойиҳасининг амалдаги таҳрири жазони ўтаётган шахсларнинг пенсия олишга доир ҳуқуқларини тўлиқ таъминланмаётгани қайд этилди.
Бугунги кунда озодликдан маҳрум қилиш жойларида жазони ўтаётган пенсия ёшидаги шахсларнинг умумий сони қарийиб 1000 кишини ташкил этади. Ушбу шахсларга пенсия таъминотини тўхтатиб қўйилиши, уларнинг қарамоғида бўлган шахсларнинг ҳуқуқларини таъминлашга ҳам таъсир қилади.
Шу сабабли, жазони ўтаётган шахсларнинг пенсиясини ишончнома асосида учинчи шахслар томонидан олиш тартибини ҳам кўриб чиқиш таклиф этилди.
Хорижий давлатлар тажрибаси шуни кўрсатадики, Испания, Чехия, Норвегия, Франция, Португалия, Германия, Греция, Нидерландия, Швеция, Россия, Украина, Беларусь каби давлатларда маҳкумларга ёшга доир, ногиронлик ва бошқа ҳуқуқий асослар бўйича пенсия тўловини амалга ошириш тартиби белгиланган.
Шу билан бирга, Беларусь, Россия ва Европа Иттифоқи мамлакатларида жазони ижро этиш муассасаларидаги ойлик харажатларни (озиқ-овқат, кийим-кечак, пойабзал ва ҳоказо) қоплаш учун жазони ўтаётган пенсионернинг пенсиясини бир қисми (пенсияни 20 фоиздан кўп бўлмаган миқдорда) ҳисобидан қоплаш амалиёти мавжудлиги қайд этиб ўтилди.
Муҳокама давомида барча жазони ижро этиш муассасаларида жазосини ўтаётган пенсионер шахсларнинг ижтимоий таъминотини янада такомиллаштириш, бу масалани қонун лойиҳасида аниқ белгилаш мақсадида қонун ташаббуси субъектига тегишли таклифлар берилди.
Изоҳ (0)