7 апрель куни аҳоли мурожаатларини тинглаш учун Президент маслаҳатчиси ўринбосари Алишер Усмонов, Президент администрацияси етакчи инспектори Шокир Отажонов, Сурхондарё вилояти Халқ қабулхонаси раҳбари Абдулҳаким Эшмуратов, Денов туманининг 4 та сектор раҳбари, Сурхондарё вилоятидаги ташкилот раҳбарлари «Меҳнатобод» маҳалласига ташриф буюрди. Бу ҳақда «Дарё»га Президент Халқ қабулхонаси матбуот хизмати маълум қилди.
Маълум қилинишича, қабул жараёнида аксарият фуқаролар мурожаатлари жойида ҳал этилди. Тоғли Сина қишлоғидан Сайёра Темирова оилавий шароити яхши эмаслиги ва ишлаш истаги борлигини айтиб мурожаат қилди. Унинг мурожаати ўша жойнинг ўзида ҳал этилиб, Сайёра Темирова ўзининг уйига яқин бўлган 14-қишлоқ врачлик пунктига ишга жойлашди.
Шунингдек, Денов туманида яшайдиган Қурбонали Шодиев тақдир тақозоси билан оғир шатоитга тушиб қолган. Унинг турмуш ўртоғи бир неча йилдан буён жигар церрози билан оғрийди. У бугунги кунда турмуш ўртоғи учун дори-дармон олишда моддий қийинчиликка дуч келмоқда. Ушбу масала Денов туман ҳокими Б.Иботов ва Денов туман Тиббиёт бирлашмаси раҳбари Й.Бўриев томонидан назоратга олиниб, унга моддий ёрдам ажратилди.
Денов туманидаги «Дашти чинор» маҳалласи фуқароси Шоҳруҳ Тўраев тадбиркорликни йўлга қўйиш истагини билдирган. Президент маслаҳатчисининг ўринбосари Алишер Усмонов Шоҳруҳ Тўраевга кредит ажратилиши бўйича кўсатма берди. Шу жойнинг ўзида 4-сектор раҳбари – Денов туман Солиқ инспекцияси раҳбари Одил Ёқубов Шоҳруҳга «Микрокредитбанк» Денов туман бўлимидан 28 миллион сўм кредит расмийлаштириш учун тавсифнома берди.
Денов туманида ўтказилган қабулда 186 та мурожаат эшитилди. Шундан 51,3 фоизи жойида ҳал этилди. Қолган 48,7 фоиз мурожаатлар назоратга олингани хабар қилинмоқда.
Изоҳ (0)