7-aprel kuni aholi murojaatlarini tinglash uchun Prezident maslahatchisi o‘rinbosari Alisher Usmonov, Prezident administratsiyasi yetakchi inspektori Shokir Otajonov, Surxondaryo viloyati Xalq qabulxonasi rahbari Abdulhakim Eshmuratov, Denov tumanining 4 ta sektor rahbari, Surxondaryo viloyatidagi tashkilot rahbarlari “Mehnatobod” mahallasiga tashrif buyurdi. Bu haqda “Daryo”ga Prezident Xalq qabulxonasi matbuot xizmati ma’lum qildi.
Ma’lum qilinishicha, qabul jarayonida aksariyat fuqarolar murojaatlari joyida hal etildi. Tog‘li Sina qishlog‘idan Sayyora Temirova oilaviy sharoiti yaxshi emasligi va ishlash istagi borligini aytib murojaat qildi. Uning murojaati o‘sha joyning o‘zida hal etilib, Sayyora Temirova o‘zining uyiga yaqin bo‘lgan 14-qishloq vrachlik punktiga ishga joylashdi.
Shuningdek, Denov tumanida yashaydigan Qurbonali Shodiyev taqdir taqozosi bilan og‘ir shatoitga tushib qolgan. Uning turmush o‘rtog‘i bir necha yildan buyon jigar serrozi bilan og‘riydi. U bugungi kunda turmush o‘rtog‘i uchun dori-darmon olishda moddiy qiyinchilikka duch kelmoqda. Ushbu masala Denov tuman hokimi B.Ibotov va Denov tuman Tibbiyot birlashmasi rahbari Y.Bo‘riyev tomonidan nazoratga olinib, unga moddiy yordam ajratildi.
Denov tumanidagi “Dashti chinor” mahallasi fuqarosi Shohruh To‘rayev tadbirkorlikni yo‘lga qo‘yish istagini bildirgan. Prezident maslahatchisining o‘rinbosari Alisher Usmonov Shohruh To‘rayevga kredit ajratilishi bo‘yicha ko‘satma berdi. Shu joyning o‘zida 4-sektor rahbari – Denov tuman Soliq inspektsiyasi rahbari Odil Yoqubov Shohruhga “Mikrokreditbank” Denov tuman bo‘limidan 28 million so‘m kredit rasmiylashtirish uchun tavsifnoma berdi.
Denov tumanida o‘tkazilgan qabulda 186 ta murojaat eshitildi. Shundan 51,3 foizi joyida hal etildi. Qolgan 48,7 foiz murojaatlar nazoratga olingani xabar qilinmoqda.
Izoh (0)