ЎФА футболчиларни ўйинни сотишга ундаган Илҳом Мўминжоновни 5 йилга, унга ёрдам берган Дилшод Жабборовни эса мавсум охирига қадар футболдан четлаштирди

Ўзбекистон футбол ассоциациясининг одоб-ахлоқ қўмитаси Наманганнинг «Навбаҳор» клуби собиқ бош мураббийи Илҳом Мўминжоновни 50 миллион сўм жаримага тортиб, 5 йилга футболга оид барча фаолиятдан четлатди. Бу ҳақда ташкилот расмий сайтида хабар берилди.

Таъкидланишича, Ўзбекистон футбол ассоциацияси одоб-ахлоқ қўмитасининг 2019 йил 20 февралдаги 02/2019-сонли йиғилиш қарорига асосан, ЎФА Футбол фаолиятини назорат қилиш бошқармасига Наманганнинг «Навбаҳор-Лочинлари» ПФК клуби собиқ бош мураббийи Илҳом Мўминжоновнинг келишилган ўйинларга алоқадорлиги юзасидан ўрганиш ва суриштирув ишларини олиб бориш юклатилган.

Маълум қилинишича, бошқарма томонидан Илҳом Мўминжоновнинг фаолиятига қонуний баҳо бериш мақсадида у билан бирга фаолият олиб борган футболчилар ва расмий шахслар суҳбатга чақирилиб, улар билан суҳбатлар ўтказилган. Аниқланган маълумотлар натижасида йиғилган бир қатор ҳужжат-далиллар кўриб чиқиш учун ЎФА одоб-ахлоқ қўмитасига тақдим қилинган.

Қўмита ҳам тақдим қилинган ҳужжат ва даллиларни ўрганиб чиқиб, 1 апрель куни ЎФА биносида якуний йиғилишини ўтказган.

Қуйидаги йиғилишда қабул қилинган қарор матни тўла ҳолича келтирилади:

1. «Навбаҳор лочинлари» ПФКнинг собиқ бош мураббийи Илҳом Мўминжонов 2017 йил мавсумида келишилган ўйинларни ташкил қилиш, жумладан, ўйин натижасига таъсир қилиш мақсадида «Навбаҳор лочинлари» ПФКнинг бир қатор футболчиларини ўйинни сотишга ундагани учун, ЎФА интизом кодексининг 5.44. бандига асосан:

- 50.000.000 (эллик) миллион сўм миқдоридаги жаримага тортилсин

- ЎФА Интизом ва одоб-ахлоқ (этика) қўмитасининг 2010 йил 2 февралдаги 01/2019-сонли йиғилиш қарори билан 1 (бир) йил муддатга футбол билан боғлиқ ҳар қандай фаолиятдан четлаштирилганлигини инобатга олиб, 4 (тўрт) йил муддатга футболдаги ҳар қандай фаолиятдан четлаштириш, умумий ҳисобда 5 (беш) йил муддатга четлаштирилсин.

2. «Сурхон» ПФК техник директори Шерзод Шарипов қўмитага ва ЎФАнинг расмий вакилларига суриштирув жараёнида ёлғон кўрсатма берганлиги ва қўмитани вазият юзасидан қарор чиқаришда чалкаштиришга ҳаракат қилгани учун 2019 йил футбол мавсуми охирига қадар футбол билан боғлиқ ҳар қандай фаолиятдан четлаштирилсин.

3. «Сурхон» ПФК жамоаси сардори Дилшод Жабборов «Навбаҳор лочинлари» ПФКнинг собиқ бош мураббийси Мўминжонов Илҳомга 2017 йил мавсумида келишилган ўйинларни ташкил қилишга ёрдам берганлиги ва футболчиларни ўйинни сотишга ундагани, шунингдек, қўмитанинг ёзма ва оғзаки сўровларига эътибор бермай узрли сабабсиз қўмита йиғилишларига келмаганлиги учун ЎФА интизом кодексининг 5.52. бандига асосан 2019 йил футбол мавсуми охирига қадар футбол билан боғлиқ ҳар қандай фаолиятдан четлаштирилсин.