Нима учун смартфон қотиб ишлайди? Гаджет ишини тезлаштириш учун 4 та лайфхак 

1-сабаб: Тўлиб қолган оператив хотира

Оператив хотира (RAM) — бу вақтинчалик ахборотни ўзида сақлайдиган, ўзгармас хотира тури бўлиб, айни вақтда фойдаланаётган ва очиқ қолган иловаларни ўзида сақлайди. У ҳар сафар бирор маълумот олиш учун қаттиқ дискка мурожаат қилиши шарт эмас. Шундай принцип туфайли смартфондаги турли вазифалар тезроқ бажарилади. Оператив хотира миқдори қанчалик катта бўлса, бир вақтнинг ўзида кўпроқ ва кучлироқ иловалар ишлаши шунчалик осон ва тез бўлади.

Бир вақтнинг ўзида бир нечта оғир иловалар ишга туширилса, телефон унумдорлиги пасаяди. Муаммо ҳозирда керак бўлмаган иловаларни ўчириш орқали ҳал қилинади. Android смартфонларида оператив хотирага чеклов ўрнатиш орқали телефон янада тезроқ ишлашига эришиш мумкин.

2-сабаб: Тўлиб қолган кеш ва керакcиз файллар

Оператив хотира ичида кеш (cаче) номли вақтинчалик хотира мавжуд бўлиб, у мунтазам ишлатиладиган файлларга тезлик билан кириш имкониятини беради. Кеш ёрдамида бир марта ишга туширилган иловалар кейинги сафар тезроқ очилади. Вақт ўтиб секин-аста кеш тўлиб боради ва телефон секин ишлай бошлайди: иловаларни ишга тушириш учун кўпроқ вақт кетади, экран ва сенсор ишлаши ёмонлашади.

Кеш асосан ижтимоий тармоқлар, мессенжерлар, браузерлар сабабли керакcиз файллар билан тўлиб қолади. Ҳар бир илованинг ўз кеч хотирасини алоҳида тозалашингиз ёки смартфоннинг “Созламалар” ва “Хотира” бўлимидан умумий тарзда тозалашингиз мумкин.

3-сабаб: Қаттиқ диск хотирасида жой кам қолиши

Хотиранинг иккинчи ва асосий тури бу қаттиқ диск бўлиб, унда барча юклаб олинган маълумотлар сақланади: иловалар, ўйинлар, фото ва видео файллар. Қаттиқ дискда жой камайиб боргани сари смартфон секин ишлай бошлайди. Мутахассисларнинг фикрича, телефон нормал ишлаши учун қаттиқ дискда камида 20% бўш жой қолиши керак. Унинг ҳолатини созламаларда текшириш мумкин.

Керакcиз файллар ва иловаларни ўчириш, муҳим фото ва видеоларни исталган булутли хотирага юклаш орқали муаммони ҳал этиш мумкин.

4-сабаб: Вируслар

Шубҳали ва текширилмаган манбалардан иловалар ва файлларни юклаб олиш орқали смартфонга вирус ўтиш хавфи ошади. Вирусларнинг мақсади смартфондаги маълумотларни зарарлаш ёки уларни ўғирлашдир. Шунингдек, чалғитувчи рекламалар кўрсатадиган вирус турлари ҳам мавжуд. Уларнинг бари гаджет ишини секинлаштиради. Вируслардан халос бўлишга антивируслар ёрдам беради. Антивирус дастурлар телефондаги зарарли иловаларни аниқлайди ва уларни ўчириб ташлайди. Телефонга вирус тушишининг олдини олиш учун ишончли манбаларда, масалан, AppStore ёки Google Playъдан юклаб олиш тавсия этилади.