Лео Мессининг шоҳона ҳаёти: ажойиб самолёт, тилла телефон ва 32 млн евролик Ferrari ҳақида

Замонамизнинг энг буюк футболчиларидан бири қимматбаҳо буюмларни ёқтиради, деб ёзади «Спорт-Экспресс» колумнисти Дмитрий Сомов.

Мол-мулк

Мессининг Барселонада каттагина уйи мавжуд. У шаҳардаги энг обрўли туман Белламарда жойлашган. Лео ҳовлини 2009 йилда, тахминан, 6 миллион евро эвазига сотиб олган. Уй ойналаридан Гарраф тоғлари ва Ўртаер денгизи соҳили кўриниб туради. Уй ичи ҳам Ўртаер денгизи услубида рангли деворлар билан ўралган. Уйнинг поллари эса тахтадан ишланган. Унда каттагина тренажёр зали ҳам жойлашган. Лео фарзандлари учун уйда ўйин майдончаси, бассейн ҳам қурган. Ва албатта ҳовлида кичик бўлса-да футбол майдони ҳам мавжуд.

Машиналар

Месси қимматбаҳо машиналар шайдоси. Унинг коллекциясида қиймати 32 миллион евро бўлган Ferrari 335 S Spider Scaglietti бор. Автомобиль 1957 йилда ишлаб чиқарилган. Машина 2016 йил аукционда дунёнинг энг қиммат автомобили сифатида баҳоланганди. Маълум бўлишича, мазкру Ferrari’га Криштиану Роналду ҳам даъвогар бўлган, бироқ Месси азалий рақибини бу борада ортда қолдирган. Ноёб автомобиль вақтида Формула 1 пойгаларида ҳам иштирок этган. Месси, шунингдек, Ferrari F 4430 Spider – 280 минг евро, Maserati Granturismo – 210 минг евро, Audi Q7 – 90 минг евро, Audi R8 – 220 минг евро, dodge Charger SRT8 – 26 минг евро, Lexus LX 570 – 66 евро каби автоуловларга ҳам эгалик қилади.

Самолёт

Лео яқиндагина шахсий самолёт сотиб олди. Футболчи ҳаво лайнери учун 15 миллион евро тўлагани ҳақида бонг урилди. Самолётда йўловчилар учун 16 та ўриндиқ бор. Улар бир вақтда 8 та каравотга айланиш имкониятига эга. Бундан ташқари самолётда 2 та ювиниш хоначаси ҳамда 2 та ошхона мавжуд.  Самолётнинг дум қисмида Месси ўйнайдиган 10-рақам акс этган. Самолёт зинасидан эса Мессининг оила аъзолари номлари ўрин олган.

Телефон

Месси нархи 1200 доллар бўлган iPhone XSMax’ни сотиб олади. Аммо уни шу даражада безатилдики, натижада унинг нархи 7 минг еврога кўтарилди. «Олма» 24 карат олтин билан қопланган. Телефоннинг орт қисмида 10 рақами ва Месси номи туширилган. Унинг пастроғида эса оила аъзолари номи акс эттирилган: Антонелла, Тиаго, Чиро, Маттео.