Германияда Россия президенти Владимир Путиннинг Украина ва Қозоғистон ҳудудлари тегишлилиги ҳақидаги 1994 йилги махфийликдан чиқарилган архив ҳужжатлари эълон қилинди. Бу ҳақда Германиянинг Der Spiegel нашри хабар бермоқда.
Ҳужжатларда 1994 йилнинг 14 январь куни ўша вақтда Санкт-Петербург шаҳар мерининг ўринбосари, шаҳар мериясининг Ташқи алоқалар қўмитаси раиси вазифасида ишлаган Владимир Путин Қрим, Украинанинг шарқий ҳудудлари ва Қозоғистон шимоли тарихан Россияга тегишли эканлигини таъкидлаган. Россиянинг амалдаги раҳбари ўшанда бу ерларни миллионлаб русийзабон аҳоли яшайдиган бошқа давлатларга ўтказилганини рус халқига тушунтириш қийинлигини айтган.
“Агар у ерларда миллионлаб ватандошларимиз яшаса, бу ҳудудлар нима учун бошқа давлатлар таркибига кирганини тушунтириб бўлмайди”, деган Путин.
Мутахассисларнинг таъкидлашича, Путин 30 йил аввал минтақадаги кескинликни русийзабон аҳолининг аҳволи билан боғлаган. Шу билан бирга, у Россия манфаатларини ҳимоя қилиш империяни қайта тиклашга уриниш эмаслигини алоҳида қайд этган.
Қайд этилишича, ўша пайтда Украинада ўн миллиондан ортиқ, Қозоғистонда эса бир миллионга яқин рус миллатига мансуб аҳоли истиқомат қиларди. Путин уларнинг иқтисодий ва ижтимоий аҳволи қониқарли бўлса, “ҳеч қандай муаммо йўқ” деб таъкидлаган.
Украина президенти Владимир Зеленский Оқ уйда АҚШ президенти Дональд Трамп билан учрашувдан сўнг ҳудудий масалаларни муҳокама қилишга тайёр эканлигини, бироқ буни фақат Владимир Путин билан юзма-юз учрашувдагина амалга ошириши мумкинлигини маълум қилди.
The Wall Street Journal маълумотларига кўра, Зеленский Трамп билан музокаралар пайтида ҳудудларни алмашиш имкониятини истисно қилмаган, аммо ўз мамлакатининг конституциявий тўсиқларига ишора қилган.
Изоҳ (0)