Ўзбекистонлик беш киши куз охирида Россияга ишлашга йўл олган. Бунга ўша ерда ишлаётган Р. исмли шахснинг «яхши иш бор, маоши ҳам анча юқори, келиб ишласангиз ёрдам бераман», деган гаплари сабаб бўлган, дея хабар беради ЎзА.
Рязан шаҳрига етиб борган йигитлар ўша таниш кишига рўйхатдан ўтиш ва ишлашга рухсатнома олиш учун паспортларини берган. У эса уларни мебел фабрикасига олиб борган. Йигитлар шу ердаги ишчилар ётоқхонасига жойлашгач, иш бошлаган.
Орадан ойлар ўтса ҳамки, ўзбекистонлик йигитлар ҳужжатларини олмагани етмагандай, уларга иш ҳақи ҳам берилмайди. Бундан норози бўлиб, улар фабрикани тарк этишга уринади. Бироқ, бу самарасиз кетади. Чунки улар «текин ишчи кучи»ни мажбуран орқага қайтаришади.
Икки ойдан кейин улар бошқа ерга, яъни Пензадаги фабрикалардан бирига олиб борилади. Бу ерда ҳам улар фабрика ва ётоқхона ўртасида бориб-келиб, ишлашга мажбур этилади.
Аммо кўчиш асносида кичик мўъжиза содир бўлди. Қул қилиб ишлатилаётган йигитлардан бири қариндошига хабар беришга муваффақ бўлади. У эса йигитларни қутқариш чорасини излай бошлайди. Ниҳоят «Истиқболли авлод» ижтимоий-ахборот маркази га қўнғироқ қилиб, вазиятни тушунтиради.
Ўз навбатида, «Истиқболли авлод» Россиядаги ҳамкори бўлган «Алтернатива» кўнгиллилар ҳаракатига ёрдам сўраб мурожаат қилди.
«Алтернатива» кўнгиллилари йигитлар мажбуран ишлатилаётган фабрикага бориб, уларни қутқаришга муваффақ бўлди.
Кўнгиллилар ўзбекистонликларга вақтинчалик ҳужжат тайёрлаб, уларни қайтариш чораларини кўрди. Алданиб, қулликка маҳкум этилган йигитлар озод бўлиб, Ўзбекистонга қайтди.
Изоҳ (0)