Ўзбекистон Республикаси Вазирлар Маҳкамаси ҳузуридаги Ўсимликлар карантини давлат инспекцияси хабар беришича, Хитой давлатидан Сирдарё вилоятига карантин рухсатномасисиз олиб кирилган 3 миллион дона тут кўчати «Бўртма нематода» касаллиги билан зарарлангани туфайли ёқиш йўли билан йўқ қилинди.
Мазкур тут кўчатлари Ўсимликлар карантини давлат инспекциясининг Марказий карантин лабораторияси текширувидан ўтказилганда илдиз қисмида шундай касаллик аниқланган ва тегишли карантин чоралари кўрилиши юзасидан хулоса берилган. Ушбу ўсимлик вируси помидор, бодринг, сабзи, пиёз, ғўза экинлари, гилос, ўрик дарахтларини кучли зарарлайди. Личинкаларнинг ривожланиши натижасида ўсимлик бутунлай нобуд бўлади. Дунё бўйича Бўртма нематодалар билан 2000 турга яқин турли оилага мансуб маданий ва ёввойи ўсимликлар зарарланган бўлиб, бу ҳолат йил сайин ортиб бормоқда.
Инспекциясининг тақдимномасига мувофиқ, вилоят ҳокимлигининг қарори билан тут кўчатлари келтирилган ҳудудда карантин ҳолати эълон қилинди. Хитойдан келтирилган 3 миллион дона тут кўчатлари вилоят экология ва атроф-муҳитни муҳофаза қилиш бошқармасининг махсус полигонида тегишли ташкилот ва идораларнинг масъул ходимлари иштирокида ёқиш йўли билан йўқ қилинди.
Ўзбекистон Республикаси «Ўсимликлар карантини тўғрисида»ги қонунининг тегишли моддасига асосан республика ҳудудига карантин остидаги маҳсулотлар ҳамда ўсимликларнинг экиш материалларини (уруғлик, кўчат, туганак, пиёзбош ва бошқалар) олиб киришдан аввал «Ўздавкарантин» инспекциясидан карантин рухсатномаси ва фитосанитария сертификатини олиш мақсадга мувофиқдир.
Изоҳ (0)