АҚШдаги Америка университетининг бир гуруҳ талабалари Alternative break дастури доирасида Ўзбекистонга келди. Бу ҳақда «Дарё»га Ёшлар медиа маркази маълум қилди.
Делегация аъзолари ташриф давомида Ўзбекистон ёшлар иттифоқи Марказий Кенгашида кўнгилли ёшлар маркази фаолияти билан яқиндан танишиб, ўзбекистонлик кўнгилли ёшлар ва олий таълим муассасалари талабалари билан ўзаро очиқ мулоқот қилди.
Хорижлик талабалар АҚШдаги кўнгилли жамоалар тажрибаси ва амалиёти ҳақида ўзбекистонлик кўнгилли ёшлар билан тажриба алмашди. Америка университетининг «Муқобил таътиллар» дастури доирасида Ўзбекистон ёшлар иттифоқи билан ҳамкорликда «Ёшларнинг дипломатия ва халқаро муносабатлардаги ўрни» мавзуига бағишланган конференция ўтказилиши режалаштирилди.
—«Муқобил таътиллар» дастури 1993 йилда АҚШ университетлари тизимига киритилган бўлиб, дастур Америка ва дунёнинг бошқа минтақаларидаги ёшлар билан танишув, маълумот алмашинуви мақсадида олий таълим муассасалари билан фаолият олиб бормоқда, — дейди делегация аъзоси Аманда Мартинез. — Америка университетининг олдинги дастурлари Жанубий Африка Республикаси, Гаити, Исроил, Кения, Молдова, Ҳиндистон ва бошқа мамлакатларда амалга оширилган. Бу йилги ўқув йилида Танзания, Вьетнам, Ўзбекистон, Куба, Гаити, Шимолий Ирландияга саёҳатлар уюштириляпти. Дастур харажатлари Америка университети кўмаги билан талабалар томонидан қопланади.
Мулоқотда Ўзбекистонда кўнгиллилик маданиятини ривожлантириш имкониятлари ва уни тарғиб қилишнинг қўшимча усуллари ўзаро муҳокама қилинди.
Изоҳ (0)