Шавкат Мирзиёев Навоий вилоятига ташрифи доирасида «Навоийазот» акциядорлик жамиятига ҳам борди. Бу ҳақда Президент матбуот хизмати маълум қилди.
Шавкат Мирзиёев 2018 йилда ҳам мазкур корхонада бўлиб, бу ерда амалга оширилаётган учта йирик инвестицион лойиҳа билан танишган, уни ўз вақтида ва сифатли якунлаш бўйича мутасаддиларга топшириқлар берган эди.
Жамият ҳудудида учта йирик инвестицион лойиҳа — поливинилхлорид (ПВХ), каустик сода ва метанол ишлаб чиқариш, аммиак ва карбамид ишлаб чиқариш ҳамда азот кислотаси ишлаб чиқариш корхоналари қурилиши қизғин давом этмоқда. Бунёд этилаётган ушбу корхоналарга замонавий, тежамкор технологик ускуналар ўрнатилади.
Президент ушбу янги объектлардаги бунёдкорлик ишлари билан танишди, қурувчилар, хорижлик инвесторлар билан мулоқот қилди. Бу ерда ишлайдиган кадрларни тайёрлаш тизимини янада такомиллаштириш лозимлигини қайд этди.
Давлат раҳбари замонавий энергия тежамкор технологиялар билан жиҳозланадиган мазкур мажмуалар маҳсулот ишлаб чиқариш ҳажмини ошириш, таннархини тушириш, рақобатбардошлигини таъминлашда муҳим омил бўлишини таъкидлади.
Шу ерда Навоий вилоятида Ўзбекистоннинг АҚШ, Бирлашган Араб Амирликлари ва Украинадаги элчихоналари кўмагида амалга ошириладиган инвестиция лойиҳалари тақдимоти ўтказилди. Президентга вилоятда саноатни ривожлантириш, ишлаб чиқаришни маҳаллийлаштириш ва бошқа тармоқларда бажарилиши кўзда тутилган лойиҳалар ҳақида ҳам маълумот берилди.
Изоҳ (0)