22 февралнинг эътиборга молик хабарлари — «Дарё» дайжестида.
Бош прокуратура Тошкент шаҳрида қиймати 1 миллион АҚШ долларига тенг тарихий қимматбаҳо буюмлар топилганлиги бўйича маълумот берди.
Маълум бўлишича, келтирилган топилмаларнинг аксарияти XIX асрга мансуб бўлиб, уларнинг деярли барчаси Ўзбекистон Миллий университетининг музейи ходими Муҳаммадбобур Юсупов томонидан сўнгги 2-3 йил давомида университетдаги профессор олимлардан музей учун олинган, ушбу ашёларда уларнинг университетга тегишлилигини тасдиқловчи муҳрлар мавжудлиги, ҳамда келтирилган 8 кг олтин эса ҳақиқатда топилмаганлиги аниқланган.
Ўзбекистон Миллий университети томонидан 2019 йилнинг 25 январида 17 турдаги топилмалар Қимматбаҳо металлар агентлигига вақтинча сақловга топширилган. Ҳозирда уларнинг тарихийлиги ва ҳақиқий қиймати ўрганилмоқда.
***
Петербургда 24 ёшли ўзбекистонлик дарвозага ўзини осди.
Ўзбекистон фуқароси Мшинский даҳасидаги боғдорчилик хўжалиги дарвозасига ўзини осган. Унинг шахси паспорти орқали аниқланган. Йигит Самарқанд вилоятида яшагани аниқланди.
***
Мактаб битирувчилари иқтидорига қараб олтин ва кумуш медаллар билан тақдирланади.
Ўзбекистон Республикаси Вазирлар Маҳкамаси «Умумий ўрта таълим муассасалари ва академик лицейларнинг иқтидорли битирувчиларини олтин ва кумуш медаллар билан тақдирлаш тартиби тўғрисида низом»ни тасдиқлади.
***
ДХХ ўзбекистонлик адашган аёл ва унинг уч нафар фарзандини Туркиядан қайтарди.
— 2013 йили ўзга юртларга кетиб, адашиб диний оқимларга аралашиб қолдим, — дейди Холбиби Кўчирова. — Истанбул шаҳрида фарзандларим билан ижарада қийналиб яшадим, болаларимнинг ҳужжатлари йўқ эди, ҳеч қаерга мурожаат қилолмадим. 10 ёшли катта фарзандим ҳужжати йўқлиги учун мактабда ўқий олмади. Ватанга қайтгим келарди, лекин қайтишни иложи бўлмади. Президентга минг раҳмат, бизга шундай имкониятлар берди. Мана бугун фарзандларим билан ўз уйимда ўтирибман.
***
Бош прокуратура Тошкент шаҳрининг туман ҳокимлари қонунга зид қарорлар қабул қилганини аниқлади.
Бош прокуратура Тошкент шаҳрида янги маҳалла марказларини қуришда аҳоли розилигини олмасдан биноларни бузиш ва қурилиш қилиш ҳолатларини аниқлади.
Туман ҳокимлари томонидан 392 та қонунга зид қарор қабул қилинган. Юнусобод туманида 56 та, Учтепа туманида 52 та, Олмазор туманида 45 та, Мирзо Улуғбек туманида 44 та ноқонуний қарор қабул қилинган.
Изоҳ (0)