Ўзбекистон Вазирлар Маҳкамаси ҳузуридаги Ўсимликлар карантини давлат инспекцияси анор экспортчилари учун чекловлар йўқлигини маълум қилди, деб ёзади «Газета.uz».
Қозоғистон Қишлоқ хўжалиги вазирлиги аввалроқ 19 февралдан ўзбек анорини олиб киришга тақиқ кўринишидаги вақтинчалик карантин фитосанитар чора жорий этилиши тўғрисида маълум қилган эди. 22 ва 31 октябрдан Ўзбекистондан олиб кирилган юкларни (684 кг ва 615 кг) текширишда, икки ҳолатда жўнатилган анорда Комсток қурти борлиги аниқланган.
Халқаро фитосанитария назоратини амалга ошириш тажрибасига кўра, кўрик жараёнида ўсимлик ва ўсимлик маҳсулотларида карантиндаги зарарли организмлар аниқланса, зудлик билан экспорт қилувчи давлатнинг карантин хизматига маълум қилинади, дея қайд этди Ўздавкарантин.
«Айни пайтда нима сабабдан Қозоғистон карантин хизмати анордан Комсток қурти аниқланганидан қарийб 120 кун ўтиб бу ҳақда маълум қилгани ҳамда ушбу маҳсулот импортига вақтинча тақиқ қўйгани ўрганилмоқда ва музокаралар олиб борилмоқда», — дейилади хабарда.
Ўзбекистоннинг анор маҳсулоти асосан Россия бозорларига етказилади (кўп ҳолларда Қозоғистон Ўзбекистон анорларини Россияга реекспорт қилади).
«Мамлакатимиз эспортёрларига ҳозирда анор маҳсулотини Россия ва бошқа мамлакатларга Қозоғистон орқали транзит тарзида олиб ўтишларида ҳеч қандай тўсиқлар мавжуд эмаслигини маълум қиламиз», — дейилади инспекция хабарида.
Изоҳ (0)