22-fevralning e’tiborga molik xabarlari — “Daryo” dayjestida.
Bosh prokuratura Toshkent shahrida qiymati 1 million AQSh dollariga teng tarixiy qimmatbaho buyumlar topilganligi bo‘yicha ma’lumot berdi.
Ma’lum bo‘lishicha, keltirilgan topilmalarning aksariyati XIX asrga mansub bo‘lib, ularning deyarli barchasi O‘zbekiston Milliy universitetining muzeyi xodimi Muhammadbobur Yusupov tomonidan so‘nggi 2-3 yil davomida universitetdagi professor olimlardan muzey uchun olingan, ushbu ashyolarda ularning universitetga tegishliligini tasdiqlovchi muhrlar mavjudligi, hamda keltirilgan 8 kg oltin esa haqiqatda topilmaganligi aniqlangan.
O‘zbekiston Milliy universiteti tomonidan 2019-yilning 25-yanvarida 17 turdagi topilmalar Qimmatbaho metallar agentligiga vaqtincha saqlovga topshirilgan. Hozirda ularning tarixiyligi va haqiqiy qiymati o‘rganilmoqda.
***
Peterburgda 24 yoshli o‘zbekistonlik darvozaga o‘zini osdi.
O‘zbekiston fuqarosi Mshinskiy dahasidagi bog‘dorchilik xo‘jaligi darvozasiga o‘zini osgan. Uning shaxsi pasporti orqali aniqlangan. Yigit Samarqand viloyatida yashagani aniqlandi.
***
Maktab bitiruvchilari iqtidoriga qarab oltin va kumush medallar bilan taqdirlanadi.
O‘zbekiston Respublikasi Vazirlar Mahkamasi “Umumiy o‘rta ta’lim muassasalari va akademik litseylarning iqtidorli bitiruvchilarini oltin va kumush medallar bilan taqdirlash tartibi to‘g‘risida nizom”ni tasdiqladi.
***
DXX o‘zbekistonlik adashgan ayol va uning uch nafar farzandini Turkiyadan qaytardi.
— 2013-yili o‘zga yurtlarga ketib, adashib diniy oqimlarga aralashib qoldim, — deydi Xolbibi Ko‘chirova. — Istanbul shahrida farzandlarim bilan ijarada qiynalib yashadim, bolalarimning hujjatlari yo‘q edi, hech qayerga murojaat qilolmadim. 10 yoshli katta farzandim hujjati yo‘qligi uchun maktabda o‘qiy olmadi. Vatanga qaytgim kelardi, lekin qaytishni iloji bo‘lmadi. Prezidentga ming rahmat, bizga shunday imkoniyatlar berdi. Mana bugun farzandlarim bilan o‘z uyimda o‘tiribman.
***
Bosh prokuratura Toshkent shahrining tuman hokimlari qonunga zid qarorlar qabul qilganini aniqladi.
Bosh prokuratura Toshkent shahrida yangi mahalla markazlarini qurishda aholi roziligini olmasdan binolarni buzish va qurilish qilish holatlarini aniqladi.
Tuman hokimlari tomonidan 392 ta qonunga zid qaror qabul qilingan. Yunusobod tumanida 56 ta, Uchtepa tumanida 52 ta, Olmazor tumanida 45 ta, Mirzo Ulug‘bek tumanida 44 ta noqonuniy qaror qabul qilingan.
Izoh (0)