Қарши шаҳридаги Мулла Тўйчи Тошмуҳаммедов номли вилоят мусиқали драма театрида «Ички ишлар органларининг намунали таянч пунктлари» республика кўрик-танловининг Қашқадарё вилояти босқичи ғолибларини тақдирлаш маросими бўлиб ўтди. Бу ҳақда вилоят ИИБ матбуот хизмати «Дарё»га маълум қилди.
Кўрик танловнинг вилоят босқичида «Намунали таянч пункти» номинацияси бўйича 1-ўрин Китоб тумани «Шарқ юлдузи» маҳалла профилактика инспектори, капитан Шерзод Юсуповга насиб этган бўлса, 2-ўринни Шаҳрисабз шаҳар, «Кеш» маҳалла профилактика инспектори, лейтенант Мақсуд Эсонов эгаллаган. 3-ўрин Қамаши тумани «Сарбозор» маҳалла профилактика инспектори, лейтенант Бўри Эгамбердиевга насиб этган.
Тадбирда сўз олган вилоят ҳокими ўринбосари Долли Аллаев мазкур тадбир ўтган йилгисидан профилактика инспекторларининг турмуш ўртоқлари ҳам таклиф этилганлиги билан алоҳида ажралиб турганлигини таъкидлади. Долли Аллаевга кўра, мазкур таклиф вилоят ҳокими Зафар Рўзиев ташаббуси билан амалга оширилаётган бўлиб, тадбир сўнгида профилактика инспекторлари ва уларнинг турмуш ўртоқларининг маданий ҳордиқ чиқаришини таъминлаш мақсадида, театр жамоаси томонидан саҳналаштирилган Чингиз Айтматовнинг «Оқ кема» асари намойиши ҳам кўзда тутилган.
Тадбирда шунингдек, 7 та номинация бўйича энг кучлилар дея эътироф этилган ғолиблар тақдирланди.
Маълумот ўрнида: Бугунги кунда вилоятда 15 та шаҳар ва туман ИИБлари мавжуд бўлиб, 620 нафар профилактика инспекторлари фаолият олиб боради.
Изоҳ (0)