Россия президентининг матбуот котиби Дмитрий Песков Венесуэлага Николас Мадурони қўриқлаш учун россиялик ёлланма қўриқчиларнинг юборилганлиги тўғрисидаги маълумотни рад этди. Бу ҳақда Meduza хабар бермоқда.
«Албатта, йўқ», — деди у «Москва. Кремль. Путин» дастурида тегишли саволга жавоб бера туриб. «Қўрқувнинг кўзлари катта», — дея қўшимча қилди табассум билан Песков.
Аввалроқ Reuters агентлиги Венесуэлага президент Мадурони қўриқлаш учун «Вагнер» хусусий ҳарбий компаниясининг 400 га яқин россиялик ёлланма қўриқчиси юборилганлигини маълум қилган эди.
23 январь куни Венесуэла мухолифатчи парламентининг спикери Хуан Гуайдо ўзини президент вазифасини вақтинча бажарувчи деб эълон қилди. Унинг ҳаракатларини АҚШ ва Лотин Америкаси мамлакатларининг аксарияти қўллаб-қувватлади. Европа Иттифоқи мамлакатда янги сайловлар белгилашни таклиф қилди. Россия, Мексика, Туркия ва бир қатор бошқа мамлакатлар амалдаги президент Николас Мадурони қўллаб-қувватлади.
Изоҳ (0)