Rossiya prezidentining matbuot kotibi Dmitriy Peskov Venesuelaga Nikolas Maduroni qo‘riqlash uchun rossiyalik yollanma qo‘riqchilarning yuborilganligi to‘g‘risidagi ma’lumotni rad etdi. Bu haqda Meduza xabar bermoqda.
“Albatta, yo‘q”, — dedi u “Moskva. Kreml. Putin” dasturida tegishli savolga javob bera turib. “Qo‘rquvning ko‘zlari katta”, — deya qo‘shimcha qildi tabassum bilan Peskov.
Avvalroq Reuters agentligi Venesuelaga prezident Maduroni qo‘riqlash uchun “Vagner” xususiy harbiy kompaniyasining 400 ga yaqin rossiyalik yollanma qo‘riqchisi yuborilganligini ma’lum qilgan edi.
23-yanvar kuni Venesuela muxolifatchi parlamentining spikeri Xuan Guaydo o‘zini prezident vazifasini vaqtincha bajaruvchi deb e’lon qildi. Uning harakatlarini AQSh va Lotin Amerikasi mamlakatlarining aksariyati qo‘llab-quvvatladi. Yevropa Ittifoqi mamlakatda yangi saylovlar belgilashni taklif qildi. Rossiya, Meksika, Turkiya va bir qator boshqa mamlakatlar amaldagi prezident Nikolas Maduroni qo‘llab-quvvatladi.
Izoh (0)