Бугун,

  • USD 10940.05
  • RUB 182.26
  • EUR 11121.65

26 декабрнинг асосий янгиликлари — «Дарё» дайжестида.

Фото: ЎзА

Фото: ЎзА

Тошкентдаги Humo Arena муз саройи ҳудудида ёнғин рўй берди.

Бугун, 26 декабрь, соат 10.35 атрофида Тошкентдаги Humo Arena кўп тармоқли муз саройи яқинида барпо этилаётган автотураргоҳ ҳудудидаги омбор учун ажратилган бинода ёнғин рўй берди.

Бу ерда қурилиш материаллари аланга олгани билдирилмоқда.

Алангаланишга пайвандлаш ишлари давомида ёнғин хавфсизлиги қоидаларига амал қилмаслик сабаб бўлгани тахмин қилинмоқда.

***

Фарғонадаги автомобилларга газ тўлдириш станцияларида узундан-узоқ навбатлар кузатилмоқда.

Ҳайдовчилар 12—14 соатлаб навбат кутишига тўғри келмоқда.

Машиналар қатнов йўлини тўсиб, бошқа транспорт ва йўловчилар ҳаракатланишида жиддий муаммолар юзага келмоқда.

***

Қорақалпоғистонда қутурган шоқол одамларга ва уй ҳайвонларига ташланмоқда.

Яқинда Қорақалпоғистон Республикаси Шуманай тумани Бегжап ОФЙ ҳудудида шоқоллар қишлоқда яшовчиларга ташланган. Фуқаро Юсуп Қурбанов ва Анвар Жолдасбаевга шоқол ташланиб, тишлаб олган. Натижада икки фуқаро ҳозирда Шуманай тумани тиббиёт бирлашмасида қутуриш касаллигига қарши даволанмоқда.

Туман ҳокимияти овчилар гуруҳини тузиб, қутурган шоқолларни отишни топширган. Бундан ташқари, агар кимда-ким шоқолни отиб ўлдирса 50 минг сўм ваъда қилинган.

***

Москва марказида ўзини тажовузкор тутиб, ўткинчиларга ҳамла қилган ўзбекистонликни қўлга олиш чоғида икки нафар полиция ходими жабрланди.

Полициячилар эркакнинг қонунга хилоф хатти-ҳаракатлари олдини олмоқчи бўлганида, у бир полициячининг юзига қўли билан зарба берган, иккинчисининг билагига шикаст етказган.

1980 йилда туғилган тартиббузарга нисбатан «Ҳукумат вакилларига нисбатан зўравонлик қўллаш» моддаси бўйича жиноят иши очилди.

***

Халқ депутатлари Олмазор, Мирзо Улуғбек ва Миробод туманларининг навбатдан ташқари сессияси бўлиб ўтди.

Сессияларда ташкилий масала кўрилди.

Шу кунга қадар Олмазор тумани ҳокими вазифасини бажарувчи бўлиб ишлаб келган Бахтиёр Раҳмонов, Мирзо Улуғбек тумани ҳокими вазифасини бажарувчи Шавкатбек Эргашев ва Миробод тумани ҳокими вазифасини бажарувчи Шуҳрат Пўлатов ҳоким этиб тайинланди.

Шунингдек, Халқ депутатлари Шайхонтоҳур тумани навбатдан ташқари сессиясида Шу кунга қадар Шайхонтоҳур тумани ҳокими вазифасини бажарувчи Муҳамедханов Шуҳрат Санжарович, Шайхонтоҳур тумани ҳокими этиб тайинланди.

Изоҳ
Асосий янгиликлар