26-dekabrning asosiy yangiliklari — “Daryo” dayjestida.
Toshkentdagi Humo Arena muz saroyi hududida yong‘in ro‘y berdi.
Bugun, 26-dekabr, soat 10.35 atrofida Toshkentdagi Humo Arena ko‘p tarmoqli muz saroyi yaqinida barpo etilayotgan avtoturargoh hududidagi ombor uchun ajratilgan binoda yong‘in ro‘y berdi.
Bu yerda qurilish materiallari alanga olgani bildirilmoqda.
Alangalanishga payvandlash ishlari davomida yong‘in xavfsizligi qoidalariga amal qilmaslik sabab bo‘lgani taxmin qilinmoqda.
***
Farg‘onadagi avtomobillarga gaz to‘ldirish stansiyalarida uzundan-uzoq navbatlar kuzatilmoqda.
Haydovchilar 12—14 soatlab navbat kutishiga to‘g‘ri kelmoqda.
Mashinalar qatnov yo‘lini to‘sib, boshqa transport va yo‘lovchilar harakatlanishida jiddiy muammolar yuzaga kelmoqda.
***
Qoraqalpog‘istonda quturgan shoqol odamlarga va uy hayvonlariga tashlanmoqda.
Yaqinda Qoraqalpog‘iston Respublikasi Shumanay tumani Begjap OFY hududida shoqollar qishloqda yashovchilarga tashlangan. Fuqaro Yusup Qurbanov va Anvar Joldasbayevga shoqol tashlanib, tishlab olgan. Natijada ikki fuqaro hozirda Shumanay tumani tibbiyot birlashmasida quturish kasalligiga qarshi davolanmoqda.
Tuman hokimiyati ovchilar guruhini tuzib, quturgan shoqollarni otishni topshirgan. Bundan tashqari, agar kimda-kim shoqolni otib o‘ldirsa 50 ming so‘m va’da qilingan.
***
Moskva markazida o‘zini tajovuzkor tutib, o‘tkinchilarga hamla qilgan o‘zbekistonlikni qo‘lga olish chog‘ida ikki nafar politsiya xodimi jabrlandi.
Politsiyachilar erkakning qonunga xilof xatti-harakatlari oldini olmoqchi bo‘lganida, u bir politsiyachining yuziga qo‘li bilan zarba bergan, ikkinchisining bilagiga shikast yetkazgan.
1980-yilda tug‘ilgan tartibbuzarga nisbatan “Hukumat vakillariga nisbatan zo‘ravonlik qo‘llash” moddasi bo‘yicha jinoyat ishi ochildi.
***
Xalq deputatlari Olmazor, Mirzo Ulug‘bek va Mirobod tumanlarining navbatdan tashqari sessiyasi bo‘lib o‘tdi.
Sessiyalarda tashkiliy masala ko‘rildi.
Shu kunga qadar Olmazor tumani hokimi vazifasini bajaruvchi bo‘lib ishlab kelgan Baxtiyor Rahmonov, Mirzo Ulug‘bek tumani hokimi vazifasini bajaruvchi Shavkatbek Ergashev va Mirobod tumani hokimi vazifasini bajaruvchi Shuhrat Po‘latov hokim etib tayinlandi.
Shuningdek, Xalq deputatlari Shayxontohur tumani navbatdan tashqari sessiyasida Shu kunga qadar Shayxontohur tumani hokimi vazifasini bajaruvchi Muhamedxanov Shuhrat Sanjarovich, Shayxontohur tumani hokimi etib tayinlandi.
Izoh (0)