Россиялик миллиардер Алишер Усмонов Forbes нашрига берган интервьюси давомида ҳозирги кунда Ўзбекистонда барча имкониятлар мавжудлиги ҳақида гапира туриб, ўзбек халқига қўлидан келгунича ёрдам беришини айтиб ўтди.
Forbes: YouTube’да сизнинг жиянингиз Сарварнинг тўйидан видео лавҳалар бор. Сиз меҳмонлар орасидаги ёшларга қуйидаги сўзларни айтдингиз: сизлар учун барча йўллар очиқ, президент сизга ёрдам беради, фақат қабул қилиб уни бажаринг. Агар Фаттоҳ (Шодиев) ва Искандaр билан (Маҳмудов) бир вақтлар бундай имкониятларга эга бўлганимизда, биз дунёни тубдан ўзгартирган бўлар эдик.
— Ҳа, шундай деган эдим. Ҳозирги кунда бизнес учун барча имкониятлар мавжуд. Ўзбекистон халқи ақлли, менимча, бу имкониятлардан фойдаланади. Мен эса қўлимдан келганича ёрдам бераман.
Шунингдек, тадбиркор суҳбат давомида на Ўзбекистонда ва на Россияда бизнес билан шуғулланишни истамаслигини айтиб ўтди:
«Мен Россияда ҳам, Ўзбекистонда ҳам бизнес билан шуғулланишни истамайман. Бугунги кунда 80 фоиз вақтимни Халқаро қиличбозлик федерациясини бошқаришга сарфламоқдаман.
9 декабрь куни биз 105 ёшга тўламиз ва биз федерацияни ташкил этган шаҳар — Парижда юбилейни нишонлаймиз.
Тадбирга барча олимпия чемпионлари, барча кўпкарра жаҳон чемпионлари, барча федерацияларни ва жаҳон спорт раҳбарларини таклиф қиламиз. Бундай тадбирни ўтказиш учун жуда кўп ишлар талаб этилади», — дейди Усмонов.
Изоҳ (0)