Қизилмия экстракти ишлаб чиқарувчиларга ушбу ўсимлик плантацияларини 2023 йилгача камида 500 гектарга ошириш мажбурияти юкланиши мумкин. Бу талаб Қишлоқ ҳўжалиги вазирлиги қонун ҳужжатлари муҳокамаси порталига жойлаган Президент қарори лойиҳасида келтирилган, дея хабар беради «Turon 24».
Лойиҳага кўра, Қизилмия ва бошқа доривор ўсимликларни етиштирувчи ва қайта ишловчилар ассоциаяцияси аъзолари 2019 йилдан бошлаб ер майдонларини йилига 100 гектарга ошириб бориши лозим. Умуман олганда, 2023 йилгача Қорақалпоғистоннинг 15 та туманида қизилмия плантацияларини яратиш учун 25 минг гектар ер ажратилади.
Айни пайтда ассоциацияга 15 та корхона ва уюшма аъзо. Ассоциацияга аъзо бўлиш мажбурий эмас. Аммо олдинроқ қизилмия ишлаб чиқарувчиларга берилган имтиёзларни эндиликда фақат ассоциация аъзоларига бериш таклиф қилинмоқда.
Айтиш жоизки, Вазирлар Маҳкамаси қарори билан қизилмия ишлаб чиқарувчиларга имтиёзли кредитлар берилиши таъминланган, шунингдек, улар барча солиқлардан озод қилинган.
Изоҳ (0)