Гўшт — 28 минг, шакар — 4,5 минг сўм. Сирдарёда байрамолди савдо ярмаркаларидаги маҳсулотлар қандай нархда сотилмоқда?

Гулистон шаҳрида ташкил этилган байрамолди савдо ярмаркасида фермер, тадбиркор, корхона ва ташкилотлар савдо павилонларида ўзлари етиштирган, ишлаб чиқараётган маҳсулотларни арзон нархларда савдога чиқарди.

– Ярмаркаларда вилоятдаги қайта ишлаш корхоналари, чорвачилик, паррандачилик, асалчилик, балиқчиликка ихтисослашган фермер хўжаликлари ўз маҳсулотлари билан иштирок этмоқда, – дейди вилоят ҳокими ўринбосари О.Абдуғаниев. – Арзон ва сифатли маҳсулотлар ярмаркаси жорий йилнинг 15 декабридан 2019 йилнинг 5 январгача давом этади. Савдоларга маҳсулотлар кунлиги кунда, пешма-пеш олиб келинмоқда. Исталган турдаги маҳсулотни харидор нақд ёки банк пластик карточкаси орқали харид қилиши мумкин. Чунки барча савдо нуқталари терминаллар билан тўлиқ таъминланган.

Дарҳақиқат, харидорлар ушбу ярмаркадан 1 килограмм гўштни 28 минг сўмдан, балиқни турига қараб 8 мингдан 12 минг сўмгача харид қилишлари мумкин. Шунингдек, 1 килограмм хурмо 2 минг сўмдан, олма 2,5 минг, гуруч навига қараб 3 мингдан 6 минг сўмгача, пиёз 800 сўмдан, картошка 1,5 минг, сабзи 1 минг 400 сўмдан, шакар 4,5 минг сўмдан, ўсимлик ёғнинг 1 литри 7 минг сўмдан, тухумнинг донаси 500 сўмдан сотилаётир. Донғи кетган Мирзаобод қовунларининг донаси катта кичиклигига қараб 8 мингдан 12 минг сўмгача, тарвузлар 10 мингдан 12 минг сўмгача харидорларга таклиф этилмоқда.

Бундан ташқари савдо расталаридан харидорлар анор ва анор шарбати, тарвуз, қовун, ошқовоқ, карам ва бошқа қишлоқ хўжалик маҳсулотларини бозордагидан анча арзон нархларда ҳам харид қилишлари мумкин.

Шунингдек, савдо ярмаркаларида турли цитрус мевалар, ичимликлар, 10 дан ортиқ турдаги нон ва нон маҳсулотлари, сут ва сут маҳсулотлари, Африка лаққаси, дўнгпешона, оқ амур ва карп каби балиқ турлари харидоргир бўлмоқда.

Вилоят марказида ташкил этилган ярмарка савдоларига ҳар куни 2,5 тоннадан гўшт, картошка, сабзи, пиёз, 2 тоннадан қовун, тарвуз, карам, ошқовоқ, 1,5 тонна балиқ, 3 минг дона тухум, 1,5 тоннадан асал, шакар, 4,5 тонна гурунч, 2 тонна ҳўл мева, 500 килограммдан цитрус мевалари ва бошқа қишлоқ хўжалиги ҳамда озиқ овқат маҳсулотлари чиқилмоқда.