Президентнинг Қашқадарёга ташрифи давомида Шаҳрисабз шаҳри, Қамаши, Косон ва Яккабоғ туманлари ҳокимлари ўзгарди

Ўзбекистон Президенти Шавкат Мирзиёев 13 декабрдан бери ташриф билан Қашқадарё вилоятида бўлиб турибди. «Дарё» манбасининг хабар беришича, ташриф давомида вилоятнинг айрим ҳудудлари раҳбарлари ўзгарган.

Хусусан, Қамаши тумани ҳокими Фахриддин Дўстмуродов ишдан олинган, унинг ўрнига шу вақтгача Бекобод тумани прокурори лавозимида ишлаб келган Шерали Санаев тайинланган.

Шунингдек, Яккабоғ тумани ҳокими Жаҳонгир Бобоев эгаллаб турган лавозимидан озод қилинган. Унинг ўрнини Шомурод Дўнаев эгаллаган — у бунгача вилоят ўрмон хўжалиги бошқармаси бошлиғи эди.

Бундан ташқари, Шаҳрисабз шаҳри ҳокими Исмат Нусуров ўрнига шу вақтгача «Ўзсаноатқурилишбанк»да бош бошқарма бошлиғи ўринбосари сифатида ишлаб келган Тўлқин Каримов тайинланган.

Косон туманига раҳбарлик қилиб келган Бахтиёр Ражабов ҳам эгаллаб турган лавозимидан озод қилиниб, унинг ўрнига шу вақтгача вилоят қишлоқ хўжалиги бошқармасини бошқариб келган Асрор Бойқараев тайинланган.

Манбанинг қўшимча қилишича, Қарши шаҳри ва Шаҳрисабз тумани тўртликлари (ҳокими, прокурори, бош милиционери ва бош солиқчиси) қаттиқ огоҳлантирилган.