2017 йил 7 декабрь куни Президент Шавкат Мирзиёев мамлакат Конституцияси қабул қилинганининг 26 йиллиги байрами муносабати афв эълон қилганди. Унга кўра, Фарғона вилоятида 12 нафар маҳкум жазони ижро этиш муассасаларидан озод қилинди. Бу ҳақда Фарғона вилояти прокуратураси «Дарё»га хабар берди.
Жазодан озод қилинган шахсларни ижтимоий ҳимоя қилиш ва уларни ҳаётга мослаштириш мақсадида бандлигини таъминлаш, ўз вақтида тиббий кўрикдан ўтказилиши, бир марталик бериладиган моддий ёрдам пулларини ўз вақтида олишлари прокуратура органлари томонидан назоратга олинган.
Бундан ташқари, жазодан озод қилинган шахсларни келгусида ҳуқуқбузарлик ва жиноят содир этмаслигини олдини олиш мақсадида кенг жамоатчилик вакиллари ҳамда ҳуқуқ тартибот ходимлари томонидан профилактик тадбирлар мунтазам ўтказиб борилиши йўлга қўйилди.
Маълумот учун, афв этиш Ўзбекистон Республикаси Президенти томонидан берилиб, судлари томонидан ҳукм қилинган Ўзбекистон фуқароларига, чет эл фуқароларига ва фуқаролиги бўлмаган шахсларга нисбатан қўлланилади.
Эслатиб ўтамиз, Конституция байрами арафидаги афв борасидаги фармон 136 кишига дахл қилиб, шундан 98 киши қамоқдан озод этилиши белгиланди. Қайд этилишича, афв этилганларнинг 62 нафари тақиқланган ташкилотлар вакилларидир.
Изоҳ (0)