Орол денгизининг Қорақалпоғистон минтақасидаги сақланиб қолган шарқий ва ғарбий қисмларида сувнинг шўрланиш даражаси 120-160 грамм/литрни ташкил этади. Бу ҳақда Ажиниёз номидаги Нукус давлат педагогика институтида «Жанубий Оролбўйи биологик хилма-хиллигини сақлаш, қайта тиклаш ва ҳимоя қилишнинг экологик масалалари» мавзусидаги илмий-назарий конференцияда баёнот қилган россиялик олим Пётр Завялов маълум қилди, дея хабар беради «Каринформ».
Бундай шўрланиш даражасида кўпчилик денгиз жонзотлари қирилиб кетади. Аммо бу Орол денгизи ўлик денгизга айланди, деган хулосани англатмайди. Ҳозирги пайтда денгизнинг сақланиб қолган сувида артемия ва уларнинг систалари, фитопланктонлар ва бентос каби жонзотлар турлари учрайди.
Россия Фанлар Академияси мухбир аъзоси, география фанлари доктори, П.Ширшов номидаги Океанология институти директори ўринбосари П.Завялов Орол денгизи бўйича дунёга машҳур экспертлардан бири ҳисобланиб, унинг раҳбарлигида денгизнинг Қозоғистон ва Қорақалпоғистон Республикалари минтақасига 21 марта экспедиция ташкиллаштирилган. Экспедициялар давомида денгиз сувининг шўрланиш даражаси, циркуляцияси, биологик хилма-хиллиги теран ўрганилган.
Конференцияда россиялик олим охирги 20 йиллик даврда Орол денгизи сувларининг гидрологик характеристикаси бўйича маъруза қилди.
Конференция доирасида институт ректори Б.Отемуратов ва Россия Фанлар Академияси ўртасида Орол денгизининг қуриган тубида амалга ошириладиган келгуси экспецияларни ҳамкорликда ташкиллаштириш, унга институтнинг профессор-ўқитувчиларини ва ёш илмий тадқиқотчиларини жалб қилиш ҳамда илмий монографиялар, ўқув қўлланмаларини ёзиш бўйича икки томонлама ҳамкорлик шартномаси имзоланди.
Изоҳ (0)