Канаданинг Оттава шаҳрида 2018 йилнинг 28 ноябрь куни Ўзбекистон—Канада вазирлар сиёсий маслаҳатлашувларининг саккизинчи раунди бўлиб ўтди. Бу ҳақда Ўзбекистон ТИВ ахборот хизмати хабар берди.
Ўзбекистон Республикаси Ташқи ишлар вазирининг ўринбосари Дилшод Ахатов ва Канада Ташқи ишлар, савдо ва тараққиёт вазирлигининг Қутб олди минтақаси, Шарқий Европа ва Евроосиё масалалари бўйича Бюро Бош директори Алисон ЛеКлаир икки томонлама ва минтақавий кун тартибининг долзарб масалалари юзасидан батафсил музокаралар ўтказдилар.
2017 йилнинг октябрь ойида Тошкент шаҳрида бўлиб ўтган ташқи сиёсий маслаҳатлашувларнинг олдинги раунди доирасида эришилган келишувларни амалга ошириш жараёни юзасидан фикр алмашилди.
Ўзбекистон ва Канада ўртасидаги ўзаро манфаатли алоқаларни янада чуқурлаштиришга томонлар содиқлиги, шунингдек, турли даражалардаги мулоқотни фаоллаштириш орқали икки томонлама муносабатларни сезиларли даражада ошириш мақсади тасдиқлади.
Музокараларда савдо-иқтисодий алоқаларни кенгайтириш, товарлар ва хизматларнинг ўзаро етказиб берилишини рағбатлантириш ва ошириш, инвестиция учун зарур шарт-шароитларни яратиш ҳамда туристлар оқимини ошириш учун чоралар қабул қилишга томонлар тайёрлиги таъкидланди.
Халқаро ва минтақавий масалаларни кўриб чиқиш давомида Афғонистондаги вазиятга алоҳида эътибор қаратилди. Икки мамлакат ҳам Афғонистон муаммосини тинч йўл билан ҳал этишдан манфаатдорлиги ва бу соҳада ҳамкорлик қилишга тайёр эканлиги қайд этилди. Ўзбекистоннинг ушбу мамлакатдаги ижтимоий-иқтисодий ҳолатни яхшилашга қаратилган саъй-ҳаракатларини қўллаб-қувватлашга салмоқли ҳисса қўшишга Канада томони тайёрлигини тасдиқлади.
Делегациялар 27 ноябрь куни Нью-Йорк шаҳрида БМТ шафелигида иш бошлаган Оролбўйи минтақаси учун инсон хавфсизлиги бўйича кўп томонлама траст фонди доирасида ҳамкорликни йўлга қўйиш юзасидан келишиб олдилар.
Шу куннинг ўзида Ўзбекистон делегацияси Канада ташқи ишлар вазири ўринбосари Иан Шугарт билан музокаралар ўтказди. Суҳбат чоғида вазирликлараро сиёсий маслаҳатлашувлар натижалари сарҳисоб қилинди ва устувор йўналишлардаги ҳамкорликни янада ривожлантириш истиқболлари кўриб чиқилди.
Оттава шаҳрида бўлиш доираси Ўзбекистон делегацияси Канада Парламентида бўлди ва Жамоалар палатаси аъзоси Зияд Абоултаиф бошчилигидаги «Канада—Ўзбекистон» дўстлик гуруҳи аъзолари билан учрашди. Канада ташқи ишлар вазирининг парламентдаги котиби Андре Лесли билан алоҳида учрашув бўлиб ўтди. Суҳбат чоғида Ўзбекистон—Канада муносабатларининг устувор йўналишлари муҳокама қилинди, шунингдек, икки томонлама алоқаларни сифат жиҳатдан янги босқичга чиқиши учун икки мамлакат қонунчилик органлари қабул қилиши лозим бўлган қатор чоралар белгиланди.
26—27 ноябрь кунлари Монреаль ва Оттава шаҳарларида Канада Экспортни ривожлантириш корпорацияси, Канада Савдони ривожлантириш корпорацияси вакиллари ҳамда Ўзбекистонда бизнес юритишга қизиқиш билдирган мамлакатнинг қатор етакчи компаниялари раҳбарлари билан учрашувлар ўтказилди.
Ўзбекистон делегацияси Канаданинг Евроосиё ва Россиядаги ишбилармон ассоциациясида (CERBA) бўлиб, етакчи ишлаб чиқариш ва молия тузилмалари учун Ўзбекистоннинг инвестициён салоҳияти тақдимотини ўтказди. Канада ишбилармон доиралари таъкидлаганидек, республикада иқтисодни эркинлаштириш ва хориж инвесторлари учун қулай шароитлар яратиш соҳасидаги ислоҳотлар Канада замонавий технологиялари ва ноу-ҳау учун ушбу истиқболли бозорга киришининг янги имкониятларини очади.
Канадада бўлиш чоғида Мактилла ва Оттава университетлари вакиллари билан музокаралар ўтказилди. Учрашувлар давомида юқори малакали кадрлар тайёрлаш, олий таълимдан кейинги таълим, талаба ва профессор-ўқитувчилар алмашинувларини ташкиллаштириш, икки дипломли таълим, шунингдек, Ўзбекистон ОТМлари тадбирларида Канада мутахассислари иштироки соҳасидаги ҳамкорлик масалалари муҳокама қилинди.
Ўзбекистон—Канада вазирликлараро сиёсий маслаҳатлашувларининг навбатдаги раунди, Канаданинг сиёсат, бизнес ва академик доиралари вакиллари билан учрашув ва музокаралар кўп қиррали ҳамкорликни янада ривожлантиришга ўзаро қизиш мавжудлигини намойиш этди ва кейинги ҳамкорлик учун аниқ йўналишларни белгилаш имкониятини берди.
Изоҳ (0)